Bansaya Sila Gikan sa Pagkabata

ANG modernong panukiduki nagpakitang “ang mga bata sa tiyan may pisiolohikal nga mga reaksiyon sa mga tingog.” Ang mga tigpanukiduki sa University of North Carolina “nakakaplag nga human basahi sa mga inahan ang ilang mga anak diha sa tagoangkan, ang bag-ong mga nahimugso misanong sa dihang gibasa pag-usab ang mga pulong,” nag-ingon ang Winnipeg Free Press. Sa dihang mobasag kusog ang mga babaye samtang nagmabdos, kini makaamot ug dako sa pagpasilsil sa maayong mga sukdanan sa moral diha sa bata. Ang Bibliya nag-ingon nga si Timoteo ‘nahibalo na sa balaang mga sinulat sukad pa sa pagkagamayng bata.’ (2 Timoteo 3:14, 15) Dayag, ang iyang inahan ug iyang apohang babaye miapresyar sa bili sa pagbansay kaniya gikan sa pagkabata, nga lagmit gayod naglakip sa pagbasag kusog.

Ang pagbasa mao “ang labing gamhanang katakos sa kinabuhi nga mabatonan nato sa atong katilingban karong adlawa,” nag-ingon ang awtor nga si Jim Trelease. Ang katakos sa pinulongan ug bokabularyo mapalambo pinaagi sa pagbasag kusog.

Maalamon nga mosugod sa pagbasag kusog labing menos samtang sugdan mo ang pagpakig-estorya sa imong bata sa tiyan. Bisan tuod ang imong wala pa matawong bata o bag-ong natawong bata sa sinugdan dili makasabot sa kon unsay imong ginasulti, ang potensiyal sa hataas-ug-tagal nga mga benepisyo takos niana. Ang Proverbio 22:6 nag-ingon: “Bansaya ang bata diha sa dalan nga iyang pagalaktan; bisan kon siya matigulang na siya dili mobiya gikan niana.”

Unsay imong mabasa nga praktikal ug mapuslanon? Basahag kusog ang Bibliya ngadto sa imong bata kada adlaw. Basaha pag-usab ang ubang bililhong mga publikasyon, sama sa Pagpatalinghog sa Dakong Magtutudlo, Akong Basahon sa mga Estorya sa Bibliya, Ang Labing Bantogang Tawo nga Nabuhi Sukad, ug ang mga artikulo sa mga magasing Bantayanang Torre ug Pagmata!

Tinuod, ang pagbuhat niini nagkinahanglan ug panahon, apan kini maayong pagkagamit nga panahon. Kini maoy dayag nga paagi aron ipakitang ikaw nagatagad ug nahigugma sa imong anak.