“Wala Ako Magdamgo, Dili Ba?”
Ang mosunod nga taho naggikan sa Malawi mahitungod sa usa sa makasaysayanhong “Malipayong mga Magdadayeg” Distritong mga Kombensiyon sa mga Saksi ni Jehova nga gihimo didto sulod sa ting-init sa 1995.
“SUBAY sa usa ka dakong karsada, mga tungatunga paingon sa kasadpang baybayon sa Lanaw Malawi, usa ka karatula ang gitaod sa unang higayon sulod sa 29 ka tuig. Kana mabasa, ‘Distritong Kombensiyon sa mga Saksi ni Jehova.’
“Usa ka dakong trak ang giparada tapad sa karatula, ug gikan sa treyler niini migula ang kapin sa 200 ka delegado gikan sa lungsod sa Mzuzu. Nagdala sila ug mga bantal sa mga sinina, mga habol, mga kaldero, mga balde, pagkaon, sugnod, ug mga Bibliya aron sa pagduyog sa mga 3,000 sa ilang mga igsoong lalaki ug babaye gikan sa ubang mga dapit.
“Samtang among gitimbaya ang mga igsoon nga nanganaog sa trak, si George Chikako, 63 anyos, miabot, nga nagduso sa iyang bisikleta latas sa balas, nga mibisikleta ug mga duha ka adlaw gikan sa Nkhotakota. Latas sa katuigan, si Brader Chikako nagsilbig upat ka sentensiya sa pagkabilanggo ingong resulta sa iyang pagdumili nga mokompromiso sa mga prinsipyo sa Bibliya. Ang iyang ig-agaw namatay gumikan sa mga pagbunal nga iyang nadawat samtang gibilanggo. ‘Wala ako magdamgo, dili ba?’ nangutana si Brader Chikako. ‘Kining kombensiyona gihimo sa adlawng dako, ug kining mga tawhana nanag-awit sa makusog ug mga alawiton sa Gingharian! Sulod sa daghang katuigan, kinahanglang magtigom kami sa gabii, maghagawhaw ug mga awit sa Gingharian, ug magbag-id sa among mga kamot ingong pagpakpak. Karon kita nagtigom nga dayag, ug ang mga tawo natingala sa pagkakita nga daghan kaayo kita sa dihang sila naghunahuna nga kita diyutay lamang!’
“Ang nahimutangan sa kombensiyon gikoralan ug kogon ug giaptan ug mga bugang aron pagtagana ug landong. Ang gagmayng mga payag nga kogon ug walay-bungbong nga mga dormitoryo gitukod aron papuy-an sa mga delegado. Ang kagabhion napuno sa tingog sa matahom mananoy nga mga honi nga dili na pinugngan sa kahadlok sa paglutos.
“Pagkahaom nga ang kombensiyon adunay tema nga ‘Malipayong mga Magdadayeg’!”
[Credit Line]
Mountain High Maps® Copyright © 1995 Digital Wisdom, Inc.