Usa ka Magasin nga Motandog sa Kasingkasing

DI-MAIHAP nga mga magasin ang gipatik sa tibuok yuta aron pagtagbaw sa kagutmanan sa magbabasa sa impormasyon o kalingawan.

Unsay nakapatalagsaon kaayo sa magasin nga imong gikuptan? Ang mosunod nga sulat, nga nadawat sa sangang buhatan sa Watch Tower Society sa Alemanya, mahimong motubag:

“Salamat kaayo, minahal nga mga igsoon, tungod sa inyong mga paningkamot ug trabaho. Sa dihang ang duha nako ka anak lalaki ug ako nahiuli gikan sa tigom, bisan pag kadto alas 9:30 s.g., ako nagpatalinghog gayod sa kinabag-ohang Watchtower [diha sa audiocassette]. Samtang nanghugas ako sa mga plato, ako misugod pagpatalinghog sa unang tun-anang artikulo (Abril 1, 1995). Gibati ko nga kinahanglang patalinghogan ko kana pag-usab, mao nga akong gihunong ang akong trabaho sa kosina ug gibasa ang artikulo [“Ikaw Bililhon sa mga Mata sa Diyos!”] diha sa The Watchtower nga duyog sa teyp. Kadto mitandog sa akong kasingkasing, ilabina ang ikaupat ug ikalimang mga parapo. Ug dayon mitubod ang mga luha​—apan wala magdugay. Ako mapasalamaton kang Jehova nga ako buhi ug sakop sa iyang katawhan ug nga ako, duyog sa daghan pang uban, makapaila sa iyang ngalan. Sa pagkatinuod wala ing katarongan nga mobating way-kapuslanan. Ang espiritu ni Jehova nagauban sa iyang katawhan. Hinaot kitang tanan molahutay ug mobarog nga lig-on sa pagtuo, nga nahiusa. Uban sa Kristohanong gugma, inyong igsoong babaye sa pagtuo.”

Ang Bantayanang Torre dili lamang mohatag kanatog impormasyon. Motandog kini sa mga kasingkasing sa mga magbabasa niini ug magtagbaw sa ilang tinguha alang sa espirituwal nga pagkaon ug tukma-sa-panahong pagpalig-on. Oo, Ang Bantayanang Torre motaganag “pagkaon sa hustong panahon.”​—Mateo 24:45.