“Gitubag ni Jehova ang Akong mga Pag-ampo!”
SA TIBUOK-YUTA, ang mga Saksi ni Jehova nagadumala ug halos lima ka milyong mga pagtuon sa Bibliya sa balay uban sa mga tawong interesado sa pagbatog tukmang kahibalo bahin sa Diyos ug sa iyang kahibulongang katuyoan alang sa katawhan. Bisan ang mga bata taliwala sa mga Saksi ni Jehova nakigbahin niining buluhatona. Tagda, pananglitan, ang usa ka bata nga ginganlag Joel. Siya nagpasimbolo sa iyang dedikasyon kang Jehova ug nabawtismohan sa nuybe anyos ang edad. Usa ka tuig sa ulahi siya nakabaton niini nga kasinatian:
“Samtang diha sa ministeryo, nahibalag ko ang usa ka babaye nga ginganlag Candy. Gitanyag ko kaniya ang brosyur nga ‘Tan-awa! Ginabag-o Ko ang Tanang Butang.’ Siya aduna na niini, busa gitanyag ko kaniya ang librong Ikaw Mabuhing Walay Kataposan sa Paraiso sa Yuta. Siya nakabaton na usab niana. Dayon ako naghunahuna, ‘Tanyagan ko kining bayhana ug pagtuon sa Bibliya.’ Siya midawat!
“Ang igsoon nga babaye ni Candy, kinsa himalatyon tungod sa sakit nga kanser, mipuyo ipon kaniya. Dugang pa, si Candy nagtuon sa pagkahimong nars. Busa sa usa ka yugto sa panahon, naputol ang pagtuon sa Bibliya. Apan ang akong mga ginikanan ug ako nagpadayon sa pagkontak kaniya pinaagi sa pagbilin ug mga magasin kaniya o sa iyang bana, si Dick. Gisultihan kami sa iyang bana nga ginabutang sa iyang asawa ang mga magasin diha sa iyang katre ug basahon kini sa gabii.
“Sa kadugayan, namatay ang igsoong babaye ni Candy. Ang akong Papa ug Mama ug ako nakighisgot kang Candy bahin sa kahimtang sa mga patay. Siya mihukom sa pagpadayon pag-usab sa iyang pagtuon sa Bibliya. Sa laing adlaw, gipangutana namo si Dick kon buot niya nga magtuon duyog kang Candy ug himoon kini nga usa ka pagtuon sa pamilya. Siya naghunahuna nga kini maoy usa ka maayong ideya. Busa karon, uban sa akong Papa, ako nagtuon kang Dick ug Candy. Sila nakahimog maayong pag-uswag ug nagpahayag ug apresasyon sa pagtuon sa Bibliya.
“Ako nag-ampo sa usa ka pagtuon sa Bibliya, ug gitubag ni Jehova ang akong mga pag-ampo!”