Paghupay Panahon sa Upat ka Tuig nga Gubat
PANAHON sa upat ka tuig nga gubat sa teritoryo sa kanhing Yugoslavia, daghang tawo ang nag-antos sa mga kalisod ug grabeng mga kanihit. Lakip kanila ang gatosan ka Saksi ni Jehova, kinsa matinumanong nagpadayon sa pagsimba sa “Diyos sa tanang paghupay.”—2 Corinto 1:3.
Sa Sarajevo, giantos sa mga tawo ang dugang kalisod sa pagpuyo sa usa ka dakong siyudad nga giatake sa katibuk-an sa gubat. May mga kanihit sa koryente, tubig, sugnod nga kahoy, ug pagkaon. Giunsa pag-alagad sa Sarajevo nga Kongregasyon sa mga Saksi ni Jehova ubos nianang hingaping mga kalisdanan? Ang mga Kristohanon gikan sa nait nga mga nasod nagpameligro sa ilang mga kinabuhi aron ipasulod ang daghang hinabang. (Tan-awa Ang Bantayanang Torre, Nobyembre 1, 1994, mga panid 23-7.) Gawas pa, ang mga igsoon sa Sarajevo nagpakig-ambit sa ilang nabatonan sa usag usa, nga nagbutang ug unang pasiugda sa pagpakig-ambit sa espirituwal nga mga butang. Panahon sa pag-atake usa ka Kristohanong magtatan-aw sa maong siyudad mihatag sa mosunod nga taho:
“Gipabilhan namo pag-ayo ang among mga tigom. Ang akong asawa ug ako, uban sa 30 pa ka tawo, mibaktas ug 15 kilometros [9 milyas] matag agi paingon sa mga tigom. Usahay gipahibalo nga ang tubig itagana sa mga panahong gihimo ang mga tigom. Unsay buhaton sa mga igsoon? Magpabilin ba sila sa balay o motambong sa mga tigom? Gipalabi sa among mga igsoon ang pagtambong sa mga tigom. Ang mga igsoon kanunayng nagtinabangay sa usag usa; bisan kon unsay naa nila, ilang gipaambit. Usa ka igsoong babaye sa among kongregasyon nagpuyo sa gawas sa siyudad, duol sa lasang; busa mas sayon kaniya ang pagpangahoy. Siya nagtrabaho usab sa usa ka panaderya, ug harina ang gisuweldo kaniya. Kon posible, magluto siyag dakong bareta sa tinapay ug dad-on kana sa tigom. Human sa tigom, sa paggawas, siya maghatag sa tanan ug usa ka hiwa.
“Hinungdanon nga walay mausa sa mga igsoong lalaki o mga babaye ang mobati gayod nga gisalikway. Walay usa nga nasayod kon kinsa kanamo ang sunod nga mangayog tabang sa daotang kahimtang. Sa dihang ang among mga karsada danglog tungod sa niyebe ug usa ka igsoong babaye nasakit, ang batan-on, kusgang mga igsoong lalaki miguyod kaniya nga sakay sa kangga paingon sa mga tigom.
“Kaming tanan nakig-ambit sa buluhatong pagsangyaw, ug si Jehova nagpanalangin sa among mga paningkamot. Siya nakakita sa among lisod kaayong kahimtang sa Bosnia, apan tungod sa iyang panalangin kami miuswag—pag-uswag nga wala namo makita sa wala pa ang gubat.”
Sa samang paagi, sa ubang gidaot-sa-gubat nga mga bahin sa kanhing Yugoslavia, ang mga Saksi ni Jehova nakatagamtam ug mga uswag bisan pa sa grabeng mga kalisdanan. Gikan sa buhatan sa mga Saksi ni Jehova sa Croatia miabot kining balitaa bahin sa usa ka grupo sa mga Saksi: “Ang mga igsoong nagpuyo sa Velika Kladus̆a ilabinang may lisod kaayong mga panahon nga sagubangon. Makadaghang giatake ang lungsod. Ang mga igsoon kinahanglang magsaysay sa ilang pagkaneyutral ngadto sa Croatiano, Serbiano, ug lainlaing Muslim nga kasundalohan. Sa pagkatinuod, dako ang ilang giantos—pagkabilanggo, mga pagkulata, kagutom, kapeligrohang mamatay. Sa gihapon, silang tanan nagpabiling matinumanon ug nakabaton sa talagsaong pribilehiyo nga nakakita sa pagpanalangin ni Jehova sa ilang mga buluhaton.”
Bisan pa sa maong mga kalisdanan, ang mga Saksi ni Jehova sa Velika Kladus̆a ug sa nait nga Bihać nagpadayon sa pagpahimulos ug mga pag-uswag samtang masiboton silang nagpakig-ambit sa mensahe sa paghupay sa Diyos sa ilang mga silingan. Ang katibuk-ang gidaghanon nga 26 ka magmamantala sa Gingharian gikan niining duha ka dapit nagdumalag 39 ka pagtuon sa Bibliya sa balay!