“Mga Mutya sa Kamatuoran”

“Mga mutya sa kamatuoran.” Mao kana ang pagbatbat sa usa ka sulat ngadto sa sangang buhatan sa mga Saksi ni Jehova sa Nigeria bahin sa duha ka espesyal nga mga magasin. Ang magsusulat, usa ka batan-ong lalaki, misaysay:

“Ako nagsulat sa pagpahayag sa akong kinasingkasing nga pasalamat alang sa inyong mga paningkamot sa pagtukbil sa halos tanang bahin sa adlaw-adlaw nga kinabuhi pinaagi sa mga magasing Bantayanang Torre ug Pagmata!

“Ako 17 anyos. Sa miaging tuig ang usa ka lokal nga estasyon sa radyo nag-esponsor sa usa ka bangga sa essay bahin sa temang ‘Aduna pay Labaw sa Gugma kay sa Sekso​—Tinuod ang AIDS.’ Ang matag essay kinahanglang dili momenos sa upat ka gatos ka pulong. Ang ganti nga 1,000 naira [$12.50, T.B.] igahatag sa kinamaayohang essay. Siyempre, sila miingon, ang mga tawo kinahanglang mosulat dili lamang aron makadaog ug premyo kondili, hinunoa, aron dunay makat-onan. . . .

“Nakaplagan nako ang impormasyon mahitungod sa AIDS diha sa duha ka magasin. Mahitungod sa gugma, dihay daghan kaayong artikulo. Gigamit nako ang mga puntos gikan sa Pagmata! sa Agosto 8, 1978.

“Halos duha ka bulan human gipadala ang akong essay, gipatik ang mga resulta. Sa akong kahibulong, ako ang nag-una sa mga estado sa Cross River ug Akwa Ibom!

“Ang tanang impormasyon nga akong gigamit naggikan sa mga magasin. Kahibulongan gayod nga si Jehova nagtagana ug tukma-sa-panahong impormasyon alang kanato niining gubot ug masakitong kalibotan. Ingong tinuod nga mga Kristohanon, kita nahibalo nga adunay labaw, labaw pa kaayo sa gugma kay sa sekso. Ug, siyempre, ang pagkinabuhi ug hinlo, moral nga kinabuhi nanalipod kanato gikan sa mga sakit sama sa AIDS.

“Natukmod ako sa pagpasalamat kaninyo tungod niining mga mutya sa kamatuoran nga walay-hunong ninyong gipatungha. Hinaot si Jehova magpadayon sa pagpanalangin sa inyong mga paningkamot samtang padayon ninyong gitagana kining bililhong mga magasin.”