Hilabihan ka Daghang Basahon!

“Sa paghimo ug daghang basahon walay kataposan,” misulat ang makinaadmanon nga Haring Solomon sa kakaraanan. (Ecclesiastes 12:12) Sulod niadtong 1995 dunay aberids nga halos usa ka bag-ong basahon ang gipatik sa Britanya alang sa kada 580 sa populasyon, nga naghimo nianang nasora nga nanguna sa kalibotan sa pagpatik ug bag-ong mga basahon. Ang Tsina, ang nasod nga kinadaghanan ug populasyon, maoy ikaduha uban ang 92,972 ka edisyon kon itandi sa 95,015 sa Britanya. Ang Alemanya misunod (67,206 ka bag-ong basahon), ug unya ang Tinipong Bansa (49,276), gisundan sa Pransiya (41,234). “Ang dakong bahin sa hinungdan kon nganong ang Britanya nanguna sa kalibotan maoy tungod sa pagkakaylap sa pinulongang Ingles,” mitaho ang The Daily Telegraph nga mantalaan sa London.

Ang mga taho nagpakita nga ang pamalit ug basahon nag-us-os sa daghan nang tuig, ug karon 80 porsiyento na lamang sa mga hamtong sa Britanya ang mopalit ug usa o kapin pang mga basahon matag tuig. Apan ang mga tawo mobasa kaha sa tanang basahon nga ilang gipamalit?

Ang usa ka basahon nga padayong kaylap nga giapod-apod ug gibasa mao ang Bibliya, nga karon mabasa na sa pipila ka bahin o sa kinatibuk-an sa kapin ug 2,120 ka pinulongan. Kon ikaw wala pay kopya, pahibaloa ang kinadul-ang buhatan sa Watch Tower Society aron makabaton ug usa. Kon aduna kay Bibliya, kuhaa kini ug susiha ang Kasulatanhong mga reperensiya nga makita sa mga artikulo niining magasina. Sa paghimo niini, imong makaplagan ang nagahatag-kinabuhi nga kahibalo sa Bibliya.