Ang Korte Suprema sa Connecticut Nagtuboy sa mga Katungod sa Pasyente

Niadtong Abril 16, 1996, ang Korte Suprema sa Connecticut, T.B.A., nagtuboy sa katungod sa mga Saksi ni Jehova nga magdumili sa pagpadugang ug dugo. Kini nga desisyon mibali sa mas sayong hukom sa korte.

Niadtong Agosto 1994, si Nelly Vega, usa sa mga Saksi ni Jehova, misugod sa grabeng pagdugo human manganak sa iyang panganay. Ang mga paningkamot aron pahunongon ang iyang sigeng pagdugo napamatud-ang wala molampos. Sa dihang migrabe ang kahimtang ni Gng. Vega, ang ospital misulay sa pagkuha ug mando sa korte nga magtugot sa pagdugang ug dugo. Si Gng. Vega nakapirma nag medikal nga dokumento nga nagmando nga walay dugo o mga tambal nga naggikan sa dugo ang ipadapat kaniya samtang nagpabilin siya sa ospital, sa ingon nagpahigawas sa ospital sa bisan unsang tulobagon tungod sa mahimong mga resulta sa iyang desisyon. Walay sapayan niini, ang ospital miergo nga ang pagpugos sa pagpadugang ug dugo maoy paglihok alang sa kaayohan sa bag-ong nahimugso, kinsa, sa sugyot sa ospital, nagkinahanglan sa inahan niini. Ang korte nabalaka usab nga, gawas sa iyang pagkanawad-an ug dugo, si Gng. Vega usa ka batan-on, himsog nga babaye. Busa, bisan pa sa mga pagtutol sa bana ni Gng. Vega ug sa iyang abogado, ang korte mihatag sa mando ug ang mga pagdugang sa dugo gipadapat.

Paglabay sa panahon, ang kaso gidala ngadto sa Korte Suprema sa Connecticut. Didto, nagkahiusang nahukman nga ang gibuhat sa ospital naglapas sa mga katungod ni Gng. Vega. Ang hukom nagpahayag: “Ang bista sa korte nahinabo sa tungang gabii, ubos sa hilabihan ka emerhensiyang mga kahimtang nga dili makatabang sa katakos sa duha ka partido aron hingpit nga matagik ang ilang mga argumento.”

Kining hukoma sa Korte Suprema sa Connecticut makahuloganon alang sa mga tawo gawas pa sa mga Saksi ni Jehova. “Hinungdanon alang sa tanang pasyente nga mahimong dili mouyon sa mga desisyon sa ilang mga doktor,” matod ni Donald T. Ridley, abogado ni Gng. Vega. “Ang hukom mopugong sa mga ospital sa pagyatak sa mga prinsipyo sa mga pasyente, relihiyoso man kini o sekular.”