Kansang mga Saad ang Imong Kasaligan?
NIADTONG 1893 usa ka grupo sa 74 ka sosyal nga mga eksperto ang nagtigom sa World’s Fair sa Chicago aron hisgotan ang umaabot. (Ang nahimutangan niini gipakita sa ibabaw.) Sa pagtan-awg 100 ka tuig sa unahan ngadto sa 1993, sila naghimo sa mosunod nga mga panagna gawas sa uban pa: “Daghang tawo ang mabuhig kutob sa 150 anyos.” “Ang mga bilanggoan momenos ug ang diborsiyo isipon na nga dili kinahanglanon.” “Ang kagamhanan mahimo nang mas simple, sanglit ang tinuod nga pagkabantogan kanunayng nakiling ngadto sa pagkasimple.”
Sa kaamgid, niadtong 1967 ang librong nag-ulohan ug The Year 2000 nagtagna: “Pag-abot sa tuig 2000, ang mga kompiyuter malagmit nga motumbas, moawat, o molabaw sa pipila sa kadaghanan nga ‘samag-tawong’ katakos sa kaisipan sa tawo, nga maglakip tingali sa pipila sa iyang maartehon ug mamugnaong mga kapasidad.” “Ang ideya sa kasarangan ug presyong mga robot nga mao ang maghimo sa kadaghanang buluhaton sa balay . . . morag rasonable kaayo pag-abot sa tuig 2000.”
Ang pagkawalay-katakos sa katawhan nga motagna sa umaabot nga mga hitabo dako kaayog kalainan sa katakos sa Diyos. Pananglitan, itandi ang gihisgotan nang mga tagna sa gitagna sa Bibliya halos 20 ka siglo na ang milabay bahin sa atong adlaw: “Ang mga tawo unya maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos, managbaton ug dagway sa diyosnong pagkamahinalaron apan nagapanghimakak sa gahom niini.”—2 Timoteo 3:1-5.
Kining tagnaa sa Bibliya mahitungod “sa kataposang mga adlaw” usa lamang sa daghan nga nagakatuman na sa atong panahon. Ang Pulong sa Diyos nagtagna nga “ang ilhanan” sa presensiya ni Jesus maglakip sa gubat sa kalibotan, mga kakulang sa pagkaon, mga kamatay, mga linog, ug ang tibuok-kalibotan nga pagsangyaw sa maayong balita sa Gingharian sa Diyos.—Mateo 24:3-14; Lucas 21:11.
Ang dili-masayop nga pagkatukma sa mga saad sa Diyos nagtukmod sa usa ka manunulat sa Bibliya nga magpahayag kasiglohan nang milabay: “Walay usa ka pulong nga nakawang sa tanang mga maayong butang nga gisulti ni Jehova nga inyong Diyos mahitungod kaninyo. Tanan nahitabo kaninyo. Walay usa ka pulong niana nga nakawang.”—Josue 23:14.
Oo, makasalig kita nga ang tanang mga saad sa Diyos duol nang matuman. Ang Gingharian sa Diyos magatapos sa sakit, krimen, pagkagiyan sa droga, gutom, ug gubat—ang tibuok yuta mahimo nang paraiso. (Salmo 37:10, 11, 29; Pinadayag 21:3, 4) Makasalig ka sa katumanan niini nga tagna! Naggikan kini sa atong Maglalalang, “si kinsa dili makabakak.”—Tito 1:2; itandi ang Hebreohanon 6:13-19.
[Picture Credit Line sa panid 32]
Cleveland State University Archive