Mga Magmamantala sa Gingharian Nagtaho
Pagkamalahutayon Motultol sa Panalangin sa Diyos sa Malawi
SI Jose maoy usa ka matinumanong alagad ni Jehova. (Hebreohanon 11:22) Siya usab usa ka tawo nga may talagsaong pagkamalahutayon. Bisag siya gibudhian sa iyang kaugalingong mga igsoon, kaduha gibaligya sa pagkaulipon, ug sa ulahi gibalhog sa bilanggoan pinasikad sa bakak nga mga sumbong, si Jose wala mawad-ig paglaom. Hinunoa, siya mapailobong milahutay sa mga tuig sa kasakitan, mapainubsanong nagpaabot sa panalangin ni Jehova.—Genesis 37:23-28, 36; 39:11-20.
Ingon man usab karong adlawa, ang mga Saksi ni Jehova sa Malawi nagpaabot nga mapailobon sa panalangin sa Diyos. Sulod sa 26 ka tuig, kining Kristohanong mga Saksi milahutay sa mga pagdili sa gobyerno, sa mapintas nga pagsupak, ug sa daghang makalilisang nga mga buhat. Apan ang ilang pagkamalahutayon gibaslan!
Sa dihang nagsugod ang paglutos sa Malawi sa hinapos ang 1967, dihay mga 18,000 ka magmamantala sa Gingharian. Hunahunaa ang kalipay sa mga Saksi sa dihang nahibaloan nilang nagsugod ang 1997 nga tuig sa pag-alagad nga may usa ka bag-ong kinatas-ang 38,393 ka magmamantala—labaw sa doble ang gidaghanon kay sa pagsugod sa pagdili! Dugang pa, ang mitambong sa 13 ka “Mga Mensahero sa Diyosnong Pakigdait” Distritong mga Kombensiyon nga gihimo sa Malawi misulbong sa kapin ug 117,000. Sa pagkatinuod, si Jehova nagpanalangin sa ilang pagtuo ug pagkamalahutayon.
Usa ka pananglitan niini nga panalangin mao ang kasinatian sa usa ka 14-anyos nga batang lalaki nga ginganlag Machaka. Sa dihang gidawat ni Machaka ang gitanyag nga pagtuon sa Bibliya uban sa mga Saksi ni Jehova, nasuko pag-ayo ang iyang mga ginikanan. Sila miingon: “Kon buot nimong mahimong Saksi, kinahanglang mopahawa ka sa balay.” Kining hulgaa, hinunoa, wala magpaluya kaniya sa pagpadayon sa iyang pagtuon. Ingong resulta, gikompiskar sa mga ginikanan ni Machaka ang tanan niyang mga sinina. Ang mga igsoon misanong pinaagi sa pagpalit kaniya ug dugang sinina. Sa dihang nahibaloan kini sa mga ginikanan ni Machaka, sila miingon kaniya: “Kon suportahan ka sa mga Saksi, kinahanglang mopahawa ka ug mopuyo ipon kanila.” Human palandongag maayo ang mga butang, si Machaka mibiya sa balay, ug usa ka pamilyang Saksi sa lokal nga kongregasyon ang midawat kaniya.
Ang mga ginikanan ni Machaka naglagot kaayo nga sila mihukom sa pagpahawa sa lugar aron malikayan ang tanang kontak uban sa mga Saksi. Siyempre, si Machaka nasubo tungod niini, apan siya nakakaplag ug dakong paghupay sa dihang gihisgotan uban kaniya sa mga igsoon ang Salmo 27:10, nga nag-ingon: “Kon ako pagabiyaan sa akong amahan ug sa akong inahan, bisan si Jehova mismo magadawat kanako.”
Sa ngadtongadto, nalukmay ang baroganan sa mga ginikanan ni Machaka, ug siya mihukom sa pagpauli sa balay. Dayag nga ang determinasyon sa ilang anak sa pag-alagad kang Jehova nakapadayeg gayod kanila tungod kay sila usab buot nang magpatuon sa Bibliya uban sa mga Saksi ni Jehova! Mitambong usab sila sa tulo ka adlaw nga “Mga Mensahero sa Diyosnong Pakigdait” nga Distritong Kombensiyon, nga human niana sila natukmod sa pagpahayag: “Sa pagkatinuod, kini maoy organisasyon sa Diyos.”
Oo, ang pagsupak mahimong masulayon, apan ang maunongong mga mensahero sa Diyos dili moangka. Sila maisogong magpadayon, nahibalo nga “ang kasakitan nagapatungha ug paglahutay; ang paglahutay, sa baylo, ug usa ka inuyonang kahimtang.” (Roma 5:3, 4) Ang mga Saksi ni Jehova sa Malawi makataronganong makapamatuod nga ang pagkamalahutayon motultol sa panalangin sa Diyos.