Nganong Dili Mouban Kanila?

SI Ndjaukua Ulimba maoy 73 anyos, ug sa miaging tuig siya mibiyaheg mga 450 kilometros. Gibaktas niya ang tibuok gilay-on, ug mikabat kini kaniyag 16 ka adlaw.

Kining edarang lalaki mihimo sa iyang dugayng pagbiyahe aron motambong sa usa sa tinuig nga mga kombensiyon sa mga Saksi ni Jehova. Human sa kombensiyon, nalipay pag-ayo ug napalig-on sa espirituwal, siya mipauli nga nagbaktas pag-usab​—laing 16 ka adlaw. Takos ba kini sa paningkamot? Oo, takos gayod! Kini nga pagbiyahe gihimo ni Ndjaukua Ulimba tuigtuig sulod sa pipila ka katuigan.

Kining tawhana nga taga-Aprika maoy usa sa kapin sa 15 ka milyon gikan sa kapin sa 230 ka kayutaan nga mitambong sa mga kombensiyon sa mga Saksi ni Jehova sa miaging tuig. Siyempre, ang kadaghanan dili kinahanglang magbaktas ug daghang adlaw sa pag-adto sa kombensiyon. Ang kadaghanan nangabot sakay sa kotse, bus, tren, o ayroplano. Usa ka ba kanila?

Sa 1998, ang mga kombensiyon pagahimoon pag-usab sa tibuok kalibotan, ang kadaghanan panahon sa mga bulan sa ting-init (o sa ugang panahon). Kon tugotan sa panglawas, lagmit himoon ni Ndjaukua Ulimba ang susamang dugayng pagbaktas aron makatambong. Siya ug ang minilyong uban pa makadungog sa mapuslanon, makapalig-on sa pagtuo, ug makapalagsik nga programa. Alang sa tanan nga motambong, ang kombensiyon maoy usa ka hinungdanong bahin sa tuig. Ikaw usab mainitong gidapit nga motambong. Ang mga Saksi ni Jehova sa inyong lugar malipay nga mosulti kanimo sa dapit sa kombensiyon nga duol kanimo.