Usa ka “Panig-ingnan sa Panaghiusa ug Panag-igsoonay”
Ingon niana ang pagkahubit sa usa ka babaye sa mga gibuhat sa mga Saksi ni Jehova human siya nag-antos sa makapaguol nga kamatayon sa usa ka membro sa pamilya. Siya misaysay:
“Sa ngalan sa akong pamilya ug kanako, gusto kong pasalamatan ang mga Saksi sa Italyanong kongregasyon sa Freiburg, Alemanya. Ang akong pamilya dili mga Saksi ni Jehova, gawas sa akong igsoong lalaki nga si Antonio ug sa iyang asawa, si Anna. Dugay na namong gisaway ang ilang gipiling relihiyon, bisan tuod kanunay namong gitahod kana.
“Apan, karon kinahanglan namong usbon ang among mga hunahuna. Sa pagkamatuod, among nasinati ang usa ka panig-ingnan sa panag-igsoonay ug gugma nga wala gayod namo dahoma.
“Makapasubo, si Anna ahat nga namatay sa usa ka aksidente sa dalan. Sanglit kami nagpuyo sa Italya, limitado lamang ang among nataganang emosyonal nga pagpaluyo sa akong igsoon nga si Antonio ug sa iyang mga anak. Apan ang iyang mga igsoong Saksi mitabang kaniya. Mitabang sila kaniya pinaagi sa ilang presensiya, ilang mga pagdasig, ilang pagtuo, ilang pisikal, moral, ug pinansiyal nga suportar. Sanglit dili nako mapasalamatan sa personal ang kongregasyon, gusto kong pasalamatan sila pinaagi sa inyong magasin tungod sa ilang panig-ingnan sa panaghiusa ug panag-igsoonay nga dili namo makalimtan.”
Ang matinud-anong mga komento niining babayhana gipabilhan. Sumala sa iyang giingon, ang mga Saksi ni Jehova maoy usa ka internasyonal nga panag-igsoonay. (1 Pedro 2:17) Ilang giugmad ang lig-ong mga bugkos sa pagbinatiay sa ilang taliwala, nga nahibalo nga ang gugma maoy “usa ka hingpit nga bugkos sa panaghiusa.” (Colosas 3:14) Bisan sa labing makapaguol nga mga kahimtang, nga mahimong modangat kanatong tanan, ang mga Saksi ni Jehova magpabiling suod sa Diyos ug sa iyang katawhan.—Proverbio 18:24; Ecclesiastes 9:11; Juan 13:34, 35.