“Kitang mga Katoliko Dakog Makat-onan Gikan Kanila”

KINI nga obserbasyon bahin sa mga Saksi ni Jehova gilitok sa usa ka magtutudlo sa Bari, Italya, panahon sa iyang klase sa hayskul bahin sa kasaysayan sa relihiyon. Giingnan sa magtutudlo ang klase nga mogamit siyag mga videocassette ingong tabang sa pagtudlo. Sa pagkadungog niini, usa sa mga estudyante, ang 18-anyos nga si Roberto, misugyot nga ilakip ang iyang relihiyon diha sa diskusyon. Iyang gitanyag kaniya ang video nga Jehovah’s Witnesses​—The Organization Behind the Name. Gidawat niya ang tanyag ni Roberto, ug ang tibuok klase nga mga 30 ka estudyante nakatan-aw sa video. “Nakadayeg ang tanan sa panaghiusa, sa organisasyon, ug sa dulot nga gugma nga naglungtad taliwala sa mga Saksi ni Jehova,” matod ni Roberto. “Labi pa silang nahingangha sa pagkasayod nga 40 ka milyong kopya sa Ang Bantayanang Torre ug 36 ka milyong kopya sa Pagmata! ang gipatik matag bulan.”

“Wala ko magdahom nga kamo organisado kaayo,” komento sa daghang klasmet ni Roberto human makatan-aw sa video. Maylabot sa mga Saksi ni Jehova, ang magtutudlo miingon sa klase: “Matikdi kon sa unsang paagi ang ilang pagtuo nagtukmod kanila nga mahiusa ug maorganisado pag-ayo. Kitang mga Katoliko dakog makat-onan gikan kanila.” Ang video ug ang misunod nga diskusyon sa klase dakog nahimo sa pagpalambo sa mas maayong pagsabot bahin sa mga Saksi ni Jehova.