“Ang Inyong Pamatasan Mao ang Gidahom sa Diyos Kanato”
SA PAKIGTAMBAYAYONG sa sekular nga mga awtoridad “tungod ug alang sa Ginoo,” ang mga Kristohanon makadahom ug “pagdayeg [ingong] mga mamumuhat sa maayo.” (1 Pedro 2:13-15) Nasinati kini sa mga Saksi ni Jehova sa Habagatang Aprika dili pa dugay sa usa ka distritong kombensiyon nga ilang gipahigayon diha sa lawak sa usa ka kolehiyo.
Sa unang adlaw sa kombensiyon, ang security police sa kolehiyo nangandam sa ilang kaugalingon alang sa naandang gidaghanon sa masuk-anon ug dili-makigtambayayong nga mga delegado, sama sa ilang nasinati sa ubang mga matang sa mga kombensiyon. Apan, kay wala pa gayod makapakiglabot sa mga Saksi ni Jehova nasinati gayod nila ang makapahimuot nga sorpresa!
Ingong bahin sa ilang regular nga mga pag-usisa alang sa seguridad diha sa mga ganghaan, ang security police nag-usisa sa matag sakyanang mosulod ug mobiya sa tinukod. Nahingangha sila sa dihang sila gitimbaya uban sa kamahigalaon, pailob, ug pagtahod, bisan pag ang mga pag-usisa nakapalangan sa mga delegado. Walay naandang pagsukol, pakiglantugi, ug maabusohong sinultihan. “Dili sama sa ubang mga bisita,” miingon ang usa ka opisyal sa seguridad, “gipasundayag ninyo ang usa ka mapainubsanong espiritu ug malinawong dignidad nga dayag kanamong tanan.”
Sa dihang namatikdan sa hepe sa seguridad ang matinabangong panggawi sa mga Saksi ni Jehova, mihukom siya nga dili na kinahanglang usisaon ang mga sakyanan “tungod kay,” siya miingon, “kamo disiplinado gayod kaayo.” Ingong resulta, ang mga sakyanan nga may mga estiker sa pagparking nga gimarkahan ug “JW” gitugotan sa pagsulod nga wala na usisaa.
Sa kataposan sa kombensiyon, ang hepe sa seguridad miingon nga gilaoman niya nga makita ang mga Saksi pag-usab sa dili madugay. “Wala pa gayod kami makakita sa maong buotan kaayong mga tawo,” siya mipahayag. “Ang inyong pamatasan mao ang gidahom sa Diyos kanato.” Ang maong komendasyon maoy dugang panukmod alang sa tinuod nga mga Kristohanon nga ‘padayong huptan ang maayong panggawi,’ aron nga ang mga tawo ‘magahimaya sa Diyos ingong resulta sa maayong mga buhat diin sila maoy mga saksing-nakakita.’—1 Pedro 2:12.