Mga Opisyales sa Kagamhanan Nagdayeg sa mga Saksi

SA Cádiz, Espanya, usa ka dunggoanang siyudad nga nahimutang mga 500 kilometros habagatan-kasadpan sa Madrid, ang mayor nga si Doña Teófila Martínez nagpresentar ug usa ka plake (gihulagway sa ibabaw) ngadto sa mga Saksi ni Jehova. Kini mabasa: “Ang kapitolyo sa Cádiz ngadto sa mga Saksi ni Jehova isip apresasyon sa ilang pakigtambayayong ug mga paningkamot alang niini nga siyudad.” Unsay gihimo sa mga Saksi aron makadawat sa maong pasidungog?

Gihatag kadto ingong pag-ila sa buluhaton nga nahimo sa mga Saksi sa pag-ayo sa usa ka bahin sa lokal nga estadyum sa siyudad. Sulod sa daghang hinapos sa semana, ginatos sa mga Saksi ang nagboluntaryo sa pagtabang nga bag-ohon ang mga kasilyas sa ground-floor sa estadyum sa potbol sa Carranza. Karon, ang tanang mogamit sa estadyum makapahimulos sa mga tubo, mga lababo ug gripo, ug salog nga gipahimutang.

Dugaydugay na, ang mga Saksi ni Jehova nagpahimulos ug maayong relasyon sa siyudad sa Cádiz. Kada tuig, ang lokal nga kagamhanan maluloton nga nagpagamit sa Carranza Stadium sa mga Saksi alang sa ilang tinuig nga distritong kombensiyon. Busa, ang mga Saksi malipay sa paghimo sa ilang maarangan sa pagtabang nga mahuptan ang estadyum sa maayong kahimtang.

Hinunoa, dugang pa sa popanahong pisikal nga mga paghago, ang mga Saksi ni Jehova regular nga nagduaw sa mga kasilinganan diha sa siyudad sa pagtabang sa publiko sa laing paagi. Sila nagmantala sa “maayong balita” sa Gingharian sa Diyos. Siyempre, wala sila makigbahin diha sa ilang publikong ministeryo aron madawat ang pagdayeg sa mga tawo. Gihimo kini isip pagtuman sa sugo ni Jesus sa pagwali sa “maayong balita sa gingharian” ug sa “paghimog mga tinun-an sa katawhan sa tanang kanasoran.” (Mateo 24:14; 28:19) Niining paagiha, ang mga Saksi ni Jehova nagalaom sa pag-alagad sa komunidad pinaagi sa pag-edukar sa mga tawo diha “sa dalan sa pagkamatarong.”​—Proverbio 12:28.