Mga Pangutana Gikan sa mga Magbabasa

Ang ubang mga Saksi ni Jehova gitanyagan ug trabaho nga naglangkit sa relihiyosong mga tinukod o propiedad. Unsa ang Kasulatanhong panglantaw sa maong mga trabaho?

Kining maong isyu tingali maatubang sa mga Kristohanon kinsa sa katim-os buot nga mopadapat sa 1 Timoteo 5:8, nga nagpasiugda sa kahinungdanon sa materyal nga pagtagana alang sa panimalay sa usa. Bisan tuod angay gayod nga ipadapat sa mga Kristohanon ang maong tambag, wala kini magpakamatarong sa ilang pagdawat sa bisan unsa ug sa tanang matang sa sekular nga trabaho, bisag unsay matang niini. Gipabilhan sa mga Kristohanon ang panginahanglan nga magmasensitibo sa ubang mga timailhan sa kabubut-on sa Diyos. Pananglitan, ang tinguha sa usa ka tawo sa pagsuportar sa iyang pamilya dili magpakamatarong sa iyang paglapas sa giingon sa Bibliya maylabot sa imoralidad o pagpatay. (Itandi ang Genesis 39:4-9; Isaias 2:4; Juan 17:14, 16.) Hinungdanon usab nga ang mga Kristohanon molihok uyon sa sugo nga mogula sa Dakong Babilonya, ang tibuok-kalibotang empiryo sa bakak nga relihiyon.​—Pinadayag 18:4, 5.

Sa tibuok kalibotan, ang mga alagad sa Diyos nag-atubang ug daghang kahimtang sa panarbaho. Walay kapuslanan ug wala kitay katungod sa pagsulay nga ilista ang tanang posibilidad ug sa paghimog tataw nga mga balaod. (2 Corinto 1:24) Apan, atong hisgotan ang pipila ka butang nga angayng tagdon sa mga Kristohanon sa paghimog personal nga mga desisyon maylabot sa panarbaho. Kining maong mga butang gisaysay sa daklit diha sa Ang Bantayanang Torre sa Enero 15, 1983, diha sa usa ka artikulo mahitungod sa pagpahimulos sa atong hinatag-sa-Diyos nga tanlag. Ang usa ka kahon mipatunghag duha ka yawing mga pangutana ug dayon milista sa ubang makatabang nga mga butang.

Ang unang yawing pangutana mao kini: Ang sekular nga trabaho mismo gihukman ba sa Bibliya? Sa pagkomento bahin niini, Ang Bantayanang Torre naghisgot nga gihukman sa Bibliya ang pagpangawat, sayop nga paggamit sa dugo, ug idolatriya. Ang usa ka Kristohanon kinahanglang maglikay sa sekular nga trabaho nga direktang nagpasiugda sa mga kalihokan nga wala kahimut-i sa Diyos, sama niadtong bag-o lang gihisgotan.

Ang ikaduhang pangutana mao: Ang paghimo ba niining maong trabaho maghimo sa usa nga kaanib sa usa ka hinukman nga buluhaton? Tin-aw, ang tawong nagtrabaho diha sa sentro sa sugalan, klinika sa aborsiyon, o sa balay sa pagpamampam maoy kaanib sa dili-kasulatanhong buluhaton. Bisan pag ang iyang adlaw-adlawng trabaho didto maoy pagpanilhig lamang sa salog o pagtubag sa telepono, siya nagtabang sa usa ka buluhaton nga gihukman sa Pulong sa Diyos.

Nakaplagan sa daghang Kristohanon nga nag-atubang ug mga desisyon maylabot sa panarbaho nga ang pag-analisar nianang maong mga pangutanaha lamang nagtabang kanila nga makab-ot ang personal nga desisyon.

Pananglitan, gikan sa maong duha ka pangutana, ang usa makasabot kon nganong ang matuod nga magsisimba dili mahimong direktang empleyado sa usa ka bakak relihiyosong organisasyon, nga nagtrabaho alang ug diha sa usa ka simbahan. Ang Pinadayag 18:4 nagpahayag sa sugo: “Gumula kamo kaniya, katawhan ko, kon dili kamo buot makaambit sa iyang mga sala.” Ang usa ka tawo nagpakig-ambit sa mga buhat ug mga sala sa Dakong Babilonya kon siya usa ka regular nga empleyado sa relihiyon nga nagtudlo sa bakak nga pagsimba. Kon ang empleyado ba kaha usa ka hardinero, dyanitor, tig-ayo, o accountant, ang iyang trabaho magpalambo sa pagsimba nga sukwahi sa matuod nga relihiyon. Dugang pa, ang mga tawo nga makakita niining maong empleyado nga nagtrabaho sa pagpatahom sa simbahan, nag-ayo niini, o naghimo sa relihiyosong mga buluhaton niini may katarongan nga maglangkit kaniya nianang relihiyona.

Apan, komosta na man ang usa nga dili regular nga empleyado sa usa ka simbahan o relihiyosong organisasyon? Tingali gipatawag lamang siya aron sa paghimog emerhensiyang pag-ayo sa nadaot nga tubo sa tubig sa silong sa simbahan. Dili kaha parehas ra kana sa iyang pagtanyag ug puhal sa usa ka kontrata, sama sa pag-atop o pagbutang ug insulasyon sa bubong sa simbahan?

Sa makausa pa, nagkadaiya kaayong mga kahimtang ang puwedeng hunahunaon. Busa atong repasohon ang dugang lima ka butang nga gihisgotan sa Ang Bantayanang Torre:

1. Ang trabaho ba usa lamang ka pag-alagad sa katilingban nga sa kaugalingon niini dili supak sa Kasulatan? Tagda pananglitan ang kartero. Ang iyang paghatod ug sulat wala magkahulogan nga nagpalambo siyag hinukmang buluhaton kon ang usa ka tinukod sa maong dapit nga iyang giserbisyohan maoy usa ka simbahan o usa ka klinika sa aborsiyon. Ang Diyos nagtagana sa kahayag sa adlaw nga nagdan-ag lahos sa mga bentana sa tanang tinukod, lakip sa simbahan o sa ingon niana nga klinika. (Buhat 14:16, 17) Ang Kristohanon nga usa ka kartero tingali maghunahuna nga ang iyang ginahimo nga pag-alagad sa katilingban maoy alang sa tanan, sa adlaw-adlaw. Kaamgid kini sa usa ka Kristohanon nga mosanong sa usa ka emerhensiya​—usa ka tubero gipatawag aron pahunongon ang pagbaha diha sa simbahan o usa ka atendant sa ambulansiya gipatawag aron tambalan ang usa ka tawo nga nakuyapan panahon sa pagsimba. Tingali iya lamang isipon kini ingong wala-damha nga pagtabang sa tawo.

2. Sa unsang gilapdon ang usa ka tawo may awtoridad sa kon unsay ginabuhat? Ang usa ka Kristohanon nga tag-iyag tindahan dili gayod mosugot nga magpedido ug mamaligyag mga idolo, espiritistikanhong mga anting-anting, mga sigarilyo, o mga soriso nga ginama sa dugo. Ingong tag-iya siya ang magbuot. Tingali ang mga tawo mag-awhag kaniya sa pagbaligyag mga sigarilyo o mga idolo ug moganansiya, apan molihok siya uyon sa iyang Kasulatanhong mga tinuohan. Sa laing bahin, ang usa ka Kristohanong empleyado sa usa ka dakong tindahan sa pagkaon tingali iasayn nga mahimong kahera, manglimpiyo sa salog, o maghupot ug libro de benta. Dili siya ang magbuot kon unsang mga produktoha ang pedidohon ug ibaligya, bisan pag ang pipila niini maoy dili maayo, sama sa mga sigarilyo o mga butang alang sa relihiyosong mga selebrasyon.a (Itandi ang Lucas 7:8; 17:7, 8.) May kalabotan kini sa mosunod nga punto.

3. Sa unsang gilapdon nalangkit ang indibiduwal? Mobalik kita sa pananglitan sa usa ka tindahan. Malagmit ang empleyado nga naasayn ingong kahera o magbutang ug mga baligya sa estante talagsa rang mag-atiman ug mga sigarilyo o relihiyosong mga butang; kana maoy gamayng bahin sa iyang kinatibuk-ang trabaho. Apan, pagkasukwahi nianang empleyado sa mao gihapong tindahan nga nagtrabaho sa estante sa tabako! Ang tanan niyang trabaho, adlaw-adlaw, nasentro sa usa ka butang nga sukwahi sa Kristohanong mga tinuohan. (2 Corinto 7:1) Nag-ilustrar kini kon nganong ang sukod sa pagkalangkit o pakigkontak kinahanglang timbangtimbangon sa paghimog desisyon maylabot sa mga suliran sa panarbaho.

4. Diin man kuhaa ang suweldo o unsa ang lokasyon nga gihimo ang trabaho? Tagda ang duha ka kahimtang. Aron moarang-arang ang reputasyon niini sa publiko, ang usa ka klinika sa aborsiyon mohukom sa pagsuhol ug usa ka tawo aron hinloan ang mga dalan sa kasilinganan. Ang iyang suweldo naggikan sa klinika sa aborsiyon, apan wala siya magtrabaho didto, ug walay usa nga makakita kaniya diha sa klinika tibuok adlaw. Hinunoa, makita nila siya nga naghimog publikong buluhaton nga sa kaugalingon niini dili sukwahi sa Kasulatan, bisag kinsa pay nagsuweldo kaniya. Aniay kalainan. Sa usa ka nasod nga legal ang pagpamampam, ang publikong serbisyo sa kahimsog nagsuweldog nars aron magtrabaho diha sa mga pampaman, nga naghimog mga paghiling sa panglawas nga gituyo sa pagkunhod sa pagkaylap sa mga sakit nga ipasa sa pakigsekso. Bisan pag gibayran siya sa publikong serbisyo sa kahimsog, ang tibuok niyang trabaho maoy sa mga pampaman, nga naghimo sa imoralidad nga mas hilwas, mas dalawaton. Kining maong mga pananglitan nag-ilustrar kon nganong ang gikuhaan sa suweldo sa usa ug ang dapit nga trabahoan maoy mga butang nga angayng timbangtimbangon.

5. Unsay epekto sa paghimo sa trabaho; makadaot ba kini sa tanlag mismo sa usa o makapandol sa uban? Angayng hatagag pagtagad ang tanlag, ang atoa ug ang sa uban. Bisan pag ang usa ka trabaho (lakip ang lugar niini ug gikuhaan sa suweldo) daw dalawaton sa kadaghanang Kristohanon, tingali gibati sa usa ka indibiduwal nga maghasol kini sa iyang kaugalingong tanlag. Si apostol Pablo, kinsa nagpakita ug maayong panig-ingnan, miingon: “Kami nagasalig nga kami may matinud-anong tanlag, sanglit buot man namong managgawi mismo nga matinud-anon sa tanang butang.” (Hebreohanon 13:18) Angay natong likayan ang pagbuhat ug trabaho nga makahasol kanato; apan, dili usab kita angayng manaway sa uban nga lahi ang tanlag. Sa kasukwahi, ang usa ka Kristohanon tingali walay nakitang supak sa Bibliya diha sa iyang pagbuhat ug usa ka matang sa trabaho, apan nakasabot siya nga makatugaw kini pag-ayo sa daghan diha sa kongregasyon ug sa komunidad. Gipabanaag ni Pablo ang hustong tinamdan diha sa iyang mga pulong: “Wala gayod kami magahatag ug unsa mang hinungdan sa pagkapandol, aron nga ang among ministeryo dili kakit-an ug sayop; apan sa tanang paagi among ginarekomendar ang among kaugalingon ingong mga ministro sa Diyos.”​—2 Corinto 6:3, 4.

Karon mobalik kita sa pangunang pangutana mahitungod sa pagtrabaho diha sa simbahan, sama sa pagtaod ug bag-ong mga bentana, paghinlo sa mga alpombra, o pag-ayo ug pagmentinar sa heater o tigpainit. Sa unsang paagi kaha malangkit ang mga butang nga gihisgotan sa ibabaw?

Hinumdomi ang punto bahin sa awtoridad. Ang Kristohanon mao ba ang tag-iya o manedyer kinsa makadesisyon kon dawaton ang maong trabaho sa usa ka simbahan? Ang usa ka Kristohanon ba nga aduna niana nga awtoridad buot nga makig-ambit sa Dakong Babilonya pinaagi sa pagtanyag nga mobuhat sa usa ka trabaho o pagpakigkontrata aron sa pagtabang sa usa ka relihiyon sa pagpalambo sa bakak nga pagsimba? Dili ba sama ra kana sa pagdesisyon nga mamaligyag mga sigarilyo o mga idolo sa tindahan mismo sa usa?​—2 Corinto 6:14-16.

Kon ang maong Kristohanon usa ka empleyado nga walay katungod sa paghimog desisyon kon unsang mga trabahoa ang dawaton, ang ubang mga butang angayng hatagag pagtagad, sama sa lokasyon ug sa gilapdon sa pagkalangkit. Ang empleyado ba gihangyo lamang sa paghatod o pagbutang ug bag-ong mga lingkoranan sa usa ka okasyon o sa pag-alagad sa katilingban, sama sa usa ka bombero nga mopalong sa kalayo diha sa usa ka simbahan sa dili pa kini mokanap? Giisip kini sa daghan nga lahi kay sa empleyado sa usa ka negosyo nga naggugol ug taas nga panahon sa pagpintal sa simbahan o regular nga nag-atiman sa tanaman aron nindot kining tan-awon. Ang maong regular o dugay nga pakigkontak magpadako sa purohan nga daghan ang maglangkit sa usa ka Kristohanon nianang relihiyon nga matod niya wala niya uyoni, nga may purohang magpandol kanila.​—Mateo 13:41; 18:6, 7.

Atong nahisgotan ang daghang hinungdanong mga pagtulotimbang mahitungod sa panarbaho. Kini gipresentar diha sa konteksto sa espesipikong pangutana nga naglangkit sa bakak nga relihiyon. Hinunoa, matulotimbang usab kini may kalabotan sa ubang matang sa panarbaho. Sa matag kaso, angayng himoon ang usa ka mainampoong pag-analisar, nga mag-isip sa espesipiko​—ug lagmit talagsaon—​nga mga bahin sa presenteng kahimtang. Ang mga butang nga gipresentar sa ibabaw nakatabang na sa daghang sinserong mga Kristohanon sa paghimog matanlagong mga desisyon nga nagbanaag sa ilang tinguha sa paglakaw nga tul-id ug matarong sa atubangan ni Jehova.​—Proverbio 3:5, 6; Isaias 2:3; Hebreohanon 12:12-14.

[Footnote]