Kapintasan—Sa Di-Madugay Matapos sa Walay Kataposan!
“Kapintasan Nagpameligro sa Nasod”—The New York Times, Tinipong Bansa.
“Kapintasan Diha sa Panimalay”—O Globo, Brazil.
“Kapintasan Nag-ukoy sa Kababayen-an sa Kalibotan”—The Globe and Mail, Canada.
INING maong mga ulohan sa balita gikan sa mga mantalaan sa Amerika del Norte ug del Sur nagpakita sa makapatugawng kiling sa tibuok kalibotan. Segun sa pagkasulti niini di pa dugay sa World Health Organization, “ang kapintasan sa tanang porma niini kusog nga nag-uswag sa di pa dugayng mga dekada.”
Tagda ang pipila ka makatugaw nga mga estadistika:
Mga pagbuno. Sa Latin Amerika ug sa Caribbeano, mga 1,250 ka tawo ang makaagom ug mapintas nga kamatayon kada adlaw. Ingong resulta, “sa katunga sa mga nasod sa maong rehiyon, ang pagbuno maoy ikaduha sa pangunang hinungdan sa kamatayon sa mga batan-on nga nag-edad ug 15-24.”
Kapintasan batok sa kabataan. Ang pisikal, seksuwal, ug emosyonal nga pag-abuso sa kabataan maoy mga suliran sa tibuok kalibotan. Pananglitan, “ang mga surbi sa mga adulto sa daghang industriyalisadong kanasoran nagpaila nga 10%–15% sa mga bata maoy mga biktima sa seksuwal nga pag-abuso—kadaghanan kanila mga babaye.”
Kapintasan batok sa kababayen-an. Human maimbestigar ang mga pag-abuso sa tawhanong mga katungod nga nahimo sa tibuok kalibotan sa 1997, ang mga tigdukiduki nakahinapos nga “ang kapintasan diha sa panimalay maoy usa sa pangunang mga hinungdan sa kadaot sa babaye sa halos matag nasod sa kalibotan.” (Human Rights Watch World Report 1998) Ang kapintasan diha sa panimalay, nga nahimong kaylap apan wala kaayo itaho nga suliran, karon gitawag ug “ang hilom nga krisis sa ika-20ng siglo.”—The Globe and Mail, Canada.
Ang yuta “napuno sa kapintasan” sama sa mga adlaw ni Noe. (Genesis 6:9-12) Apan si Jehova nga Diyos nagtipig nianang “magwawali sa pagkamatarong” ug sa iyang pamilya nga buhi sa “dihang nagpadangat siya ug lunop sa usa ka kalibotan sa dili-diyosnong katawhan.” Ang Diyos molihok sama niana sa atong adlaw. Iyang tipigan ang “katawhan nga may diyosnong pagkamahinalaron” sa dihang iyang wagtangon ang mapintas ug daotan ug himoon kining yutaa nga usa ka paraiso diha sa iyang gisaad nga bag-ong kalibotan. (2 Pedro 2:4-9; 3:11-13) Wala ka ba mahinam sa pagkahibalo nga ang kapintasan sa di madugay matapos sa walay kataposan?