Pag-amping sa Usa ka Maayong Ngalan

ANG pagtuon pag-ayo sa usa ka matahom nga dibuho mahimong usa ka magantihong kasinatian. Pinaagi sa pag-usisa, mamatikdan sa usa kon sa unsang paagi ang usa ka pintor naghimog gatosan ka agi sa brutsa aron sa pagbutang ug nagkadaiyang mga kolor diha sa canvas.

Sa susama, ang usa ka maayong ngalan maugmad, dili pinaagi sa usa ka lapad nga agi sa brutsa, ingnon ta, kondili pinaagi sa daghang ginagmayng mga buhat sulod sa usa ka yugto sa panahon. Oo, sa inanay ang atong reputasyon maugmad pinaagi sa mga buhat nga atong ginahimo.

Sa laing bahin, ang usa ka sayop-pagkahiluna nga agi sa brutsa makapamenos sa bili sa dibuho. Ingon usab niana ang atong ngalan. Ang maalamong Haring Solomon miingon: “Ang binuang sa usa ka tawo mao ang modaot sa iyang dalan.” (Proverbio 19:3) Nagkinahanglan lang ug usa ka gitawag ug gamayng binuang​—tingali usa ka mapintas nga pagsilaob sa kasuko, usa ka di-makasaranganong pagpatuyang sa alkoholikong mga ilimnon, o usa ka di-putling seksuwal nga buhat​—aron sa paghugaw sa usa ka maayong reputasyon. (Proverbio 6:32; 14:17; 20:1) Busa, pagkahinungdanon nga maningkamot kita sa pagbaton ug usa ka maayong ngalan ug masibotong molihok sa pag-amping niini.​—Itandi ang Pinadayag 3:5.