Sa Unsang Paagi Hinumdoman Ka ni Jehova?
“HINUMDOMI ako, Oh akong Diyos.” Sa makadaghan nangaliyupo si Nehemias sa Diyos nianang mga pulonga. (Nehemias 5:19; 13:14, 31) Natural lamang nga sa dihang ang mga tawo mahiagom sa hilabihang kagul-anan, sila modangop sa Diyos uban ang mga pangamuyo nga sama niana.
Apan, unsay anaa sa hunahuna sa mga tawo sa dihang mohangyo sila sa Diyos sa paghinumdom kanila? Tin-aw, sila nanghinaot nga ang Diyos mohimo ug labaw pa kay sa paghinumdom sa ilang mga ngalan. Sa walay duhaduha nanghinaot sila sa samang paagi sa gihimo sa usa sa mga kriminal nga gipatay kauban ni Jesus. Kining tawhana, dili sama sa usa, nangamuyo kang Jesus: “Hinumdomi ako sa dihang mahiadto ka na sa imong gingharian.” Buot niya nga si Jesus dili lamang mahinumdom kon kinsa siya kondili dunay buhaton usab alang kaniya—banhawon siya.—Lucas 23:42.
Uyon niana, ang Bibliya nagpakita nga sa Diyos, ang “paghinumdom” nagpasabot ug paghimog positibong aksiyon. Pananglitan, human palunopi ang yuta sulod sa 150 ka adlaw, “ang Diyos nahinumdom kang Noe . . . , ug gipahuros sa Diyos ang hangin sa ibabaw yuta, ug minghubas ang mga tubig.” (Genesis 8:1) Kasiglohan sa ulahi, si Samson, nga gibutaan ug gikadenahan sa mga Filistehanon, miampo: “Jehova, hinumdomi ako, palihog, ug baskoga ako, palihog, niini lamang makausa.” Gihinumdoman ni Jehova si Samson pinaagi sa paghatag kaniyag labaw-tawhanong kusog aron makapanimalos siya sa mga kaaway sa Diyos. (Maghuhukom 16:28-30) Bahin kang Nehemias, gipanalanginan ni Jehova ang iyang mga paningkamot, ug ang matuod nga pagsimba napasig-uli sa Jerusalem.
“Ang tanang butang nga gisulat kanhi gisulat alang sa atong instruksiyon, aron nga pinaagi sa atong pag-agwanta ug pinaagi sa paghupay gikan sa mga Kasulatan kita makabatog paglaom,” misulat si apostol Pablo. (Roma 15:4) Kon atong hinumdoman si Jehova pinaagi sa pagtinguha sa pagtuman sa iyang kabubut-on, sama sa gihimo sa iyang matinumanong mga alagad sa kakaraanan, makasalig kita nga si Jehova mahinumdom kanato pinaagi sa pagtabang kanato nga makabaton sa atong adlaw-adlawng mga panginahanglan, pinaagi sa pagpaluyo kanato sa atong mga pagsulay, ug pinaagi sa pagluwas kanato sa dihang ipahinabo niya ang paghukom sa mga dili-diyosnon.—Mateo 6:33; 2 Pedro 2:9.