Mga Tawo—Mas Hataas ba Lamang nga mga Mananap?
“Hinungdanon ba kon unsay atong gituohan bahin sa sinugdanan sa kinabuhi?”
Usa ka 16-anyos nga babaye sa Brazil ang misukna niining pangutanaha diha sa introduksiyon sa iyang pakigpulong bahin sa ulohang “Mga Tawo—Mas Hataas ba Lamang nga mga Mananap?” Gidapit siya sa iyang magtutudlo sa pagpahayag diha sa klase sa maong pangutana, human madawat sa magtutudlo ang kopya sa Hunyo 22, 1998, nga gula sa Pagmata! bahin nianang ulohana.
Gipasiugda sa batan-ong Saksi kon unsa ka makadaot ang pagpanudlo sa ebolusyon nga pinasukad sa natural selection. Pananglitan, nagtuo ang daghang tawo nga ang teoriya sa ebolusyon mitultol sa uban sa paglantaw sa gubat ingong usa lamang ka kinaiyanhong bahin sa walay-kataposang pakigbisog aron mabuhi, nga nakatabang sa pagkaugmad sa Fascismo ug Nazismo.
Gipakita sa estudyante nga dunay dako kaayong kalainan sa mga tawo ug sa mga mananap. Siya miingon: “Mga tawo lamang ang makaugmad ug espirituwalidad. Mga tawo lamang ang naningkamot sa pagdiskobre sa kahulogan ug katuyoan sa kinabuhi. Mga tawo lamang ang matugaw sa kamatayon, may pagtagad bahin sa ilang sinugdanan, ug dunay tinguha nga mabuhi sa walay kataposan. Pagkahinungdanon nga kita mogugol ug panahon sa pagtuki ug dugang pa bahin sa atong sinugdanan!”
Gidayeg sa magtutudlo ang maayong presentasyon. Ang iyang gihatag nga rason sa kalamposan niini mao ang pagkahilig nga mobasa niining batan-ong tin-edyer nga Saksi. Ang maong babaye nailhan sa eskuylahan nga himasa sa binase-sa-Bibliya nga mga publikasyon sama sa Pagmata! ug Ang Bantayanang Torre.
Ang mga Saksi ni Jehova sinserong nabalaka bahin sa epekto sa teoriya sa ebolusyon diha sa kasingkasing ug hunahuna sa mga batan-on. Tungod niini, ang kongregasyon nga gianiban niining maong babaye nagdasig sa batan-ong mga Saksi sa paghatag ug kopya sa Hunyo 22, 1998, nga magasing Pagmata! ngadto sa ilang mga magtutudlo ug mga kauban sa eskuylahan. Mga 230 ka magasin ang napanagtag diha sa nagkadaiyang mga eskuylahan sa siyudad. Ang pangulo sa Departamento sa Siyensiya diha sa usa ka eskuylahan misuskribir sa magasing Pagmata!
Oo, hinungdanon kon unsay atong gituohan bahin sa sinugdanan sa kinabuhi! Gipakita niining maong batan-on ug sa iyang mga higala nga ang pagtuo bahin sa usa ka Maglalalang nakahimog dakong kalainan sa ilang kinabuhi.