Kinsa ang Motapos sa Kapintasan?
SA Septiyembre 1999, ang Sekretaryo-Heneral sa HK nga si Kofi Annan nag-abiabi sa mga delegado sa ika-54ng tinuig nga sesyon sa Asembliya Heneral. Ingon sa gitaho diha sa The Toronto Star, iyang giaghat ang mga lider sa kalibotan, nga nag-ingong: “Daghan kaayong tawo ang nagkinahanglan ug labaw pa kay sa mga pulong sa kaluoy gikan sa internasyonal nga komunidad. Sila nagkinahanglag tinuod ug makanunayong pagkakomitido aron matabangan sila nga taposon ang mga siklo sa kapintasan, ug tabangan sila nga makasugod sa hilwas nga pagbalhin paingon sa kauswagan.”
Ang HK ug ang mga nasod nga membro niini makatagana ba sa “tinuod ug makanunayong pagkakomitido” nga gikinahanglan aron taposon ang kapintasan? Gikutlo diha sa mao gihapong taho sa Star, si Presidente Bill Clinton sa T.B. nag-ingon: “Human sa tanang pag-ula ug dugo niining sigloha, kita nahibalo nga sayon rang moingon nga ‘dili na gayod kini mahitabo pag-usab,’ apan mas lisod ang paghimo niini.” Siya midugang: “Ang pagsaad ug hinobra mahimong sama ka di-maluluy-on sa kawalay pagtagad.”
Kapin sa 2,500 ka tuig kanhi, ang manalagnang Jeremias miingon bahin sa mga paningkamot sa tawo: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Nan, unsay paglaom nga matapos ang kapintasan?
Ingon sa atong mabasa sa Isaias 60:18, ang Diyos nagpasalig: “Dili na madungog ang kapintas diha sa imong yuta, pagpangagaw o pagkahugno sulod sa imong mga utlanan.” Kanang tagnaa may unang katumanan sa dihang gipasig-uli sa Diyos ang iyang nadestiyero nga katawhan sa ilang pinuy-anang yuta. Kana usab adunay mas dakong katumanan nga atong matagamtam. Si Jehova nga Diyos wala ‘magsaad ug hinobra.’ Ingong ang Labing Hataas ug ang Maglalalang sa katawhan, siya anaa sa kinamaayohang posisyon nga taposon ang “mga siklo sa kapintasan.” Ubos sa Gingharian sa Diyos, ang kalinaw molungtad. Ang kapintasan mawala na hangtod sa hangtod!—Daniel 2:44.