Nganong Magmapinasayloon?

“ANG mga siyentipiko naglansad ug panukiduki nga nagpasundayag nga ang pagpasaylo makapausbaw gayod sa emosyonal—ug, posible gayod, sa pisikal—nga kahimsog,” nagtaho ang The Toronto Star sa Canada. Bisan pa niana, si Propesor Carl Thoresen sa Stanford University, T.B.A., pangulong tigdukiduki sa Stanford Forgiveness Project, nag-ingon nga “diyutay ra kaayong mga tawo ang nakasabot kon unsay pagpasaylo ug kon sa unsang paagi kini nagaobra.”

Ang tinuod nga pagpasaylo giisip ingong usa ka hinungdanong bahin sa Kristiyanidad. Ang taho sa The Toronto Star naghubit niana ingong “pag-ila nga ikaw gihimoag sayop, pagwagtang sa tanang misangpot nga kayugot, ug ngadtongadto pagpakitag pagkamabination ug bisan gugma ngadto sa nakasala.” Kinahanglang ipakita kini nga lahi gikan sa pagkonsentir, pagpalabay, pagkalimot, o paglimod sa sayop; ni nagkahulogan kini nga imong tugotan ang imong kaugalingon nga maabusahan pag-usab. Ang taho nag-ingon nga ang yawi sa tinuod nga pagpasaylo mao ang “pagwagtang sa kasuko ug negatibong mga pagbati.”

Ang mga tigdukiduki nag-ingon nga dugang pagtuon sa pisikal nga mga kaayohan sa pagpasaylo ang gikinahanglan. Apan, sila nagtaho ug sikolohikanhong mga kaayohan, lakip sa “menos nga tensiyon, kabalaka ug depresyon.”

Ang maayong katarongan nga magmapinasayloon gipahayag diha sa Efeso 4:32, nga nag-ingon: “Magmaluloton ngadto sa usag usa, magmabination uban ang kalumo, bukas nga magapasaylo sa usag usa maingon nga ang Diyos usab pinaagi kang Kristo bukas nga mipasaylo kaninyo.” Maylabot sa pagkamapinasayloon, maingon man sa ubang mga bahin, kita giawhag nga mahimong mga tigsundog sa Diyos.—Efeso 5:1.

Ang dili pagpasaylo sa uban sa dihang adunay pasukaranan alang sa kaluoy makadaot sa ato mismong relasyon sa Diyos. Si Jehova nagdahom kanato nga magpinasayloay sa usag usa. Dayon kita makaampo nga siya mopasaylo kanato.—Mateo 6:14; Marcos 11:25; 1 Juan 4:11.