Siya “Nakalahutay Hangtod sa Kataposan”
DIHA sa usa ka pagpasalida sa video niadtong 1993 alang sa bag-ong mga membro sa kawani sa hedkuwarter sa mga Saksi ni Jehova, gipahayag ni Lyman Alexander Swingle ang iyang mga pagbati bahin sa pag-alagad kang Jehova: “Mamatay kita nga magsul-ob ug botas!”a
Ang 90-anyos nga si Brader Swingle nagbuhat sumala gayod sa gidasig niyang buhaton sa uban. Siya “nakalahutay hangtod sa kataposan.” (Mateo 24:13) Bisan tuod nag-antos sa sakit sa lawas, sa Miyerkoles, Marso 7, siya mitambong sa tigom sa Nagamandong Lawas sa mga Saksi ni Jehova nga niana siya usa ka membro. Sa pagka-Martes migrabe ang iyang kahimtang, ug sa alas 4:26 s.b., Marso 14, gipahayag na siyang patay sa iyang doktor.
Si Lyman Swingle nagsugod sa iyang pag-alagad sa tibuok-kalibotang hedkuwarter sa mga Saksi ni Jehova sa Brooklyn, New York, niadtong Abril 5, 1930. Siya nag-alagad didto sa duolag 71 ka tuig. Si Lyman unang giasayn sa tahianan ug basahon, dayon sa imprentahanan, ug mitabang usab siya sa paghimog tinta. Ngani, si Brader Swingle migugol ug mga 25 ka tuig sa departamento sa paghimog tinta. Nag-alagad usab siya ug mga 20 ka tuig ingong membro sa kawani sa panulat sa hedkuwarter. Sa kataposang 17 ka tuig sa iyang kinabuhi, siya nagtrabaho sa Opisina sa Tesorero.
Si Lyman maoy usa ka maisogong magmamantala sa Gingharian sa Diyos. Sa iyang sayong katuigan sa Brooklyn, siya ug ang iyang kauban sa kuwarto, si Arthur Worsley, naanad sa paglawig sa Hudson River sakay sa usa sa mga sakayan sa mga Saksi. Ginamit ang kahimanan sa pagpadako sa tingog, gigugol nila ang daghang hinapos sa semana sa pagwali sa mensahe sa Gingharian ngadto sa mga tawong nanimuyo diha sa kabaybayonan.
Si Brader Swingle natawo niadtong Nobyembre 6, 1910, sa Lincoln, Nebraska, apan wala magdugay human niana ang pamilya mibalhin sa Salt Lake City, Utah. Didto, sa 1913, ang iyang mga ginikanan nahimong mga Estudyante sa Bibliya, sumala sa pagtawag kaniadto sa mga Saksi ni Jehova. Sa daghang katuigan, ang pamilyang Swingle nakaabiabi ug daghang nagaduaw nga mga mamumulong gikan sa hedkuwarter sa mga Saksi sa Brooklyn, ug kining mga tawhana nakamugnag positibong impluwensiya kang Lyman. Sa 1923, sa pangedarong 12, siya nagpabawtismo ingong simbolo sa iyang pagpahinungod ngadto sa Diyos.
Human mag-alagad ug kapin sa 26 ka tuig sa Brooklyn ingong ulitawo, ang kinabuhi ni Lyman natugob pag-ayo sa dihang naminyo siya kang Crystal Zircher niadtong Hunyo 8, 1956. Kanunay silang magkuyog, magkauban nga nakigbahin diha sa ministeryo hangtod sa kamatayon ni Crystal niadtong 1998. Mga tulo ka tuig una pa niana, si Crystal naestrok nga tungod niana siya grabeng nabaldado. Ang adlaw-adlaw nga kalangkitan ni Lyman sa pag-atiman kaniya maoy panig-ingnan sa debosyon nga nakapadasig sa tanan, ilabina sa mga tawong nakakita kang Lyman nga sa kamahigugmaon nagtulod sa wheelchair diha sa mga aseras sa kasilinganan samtang si Crystal nagtanyag sa Ang Bantayanang Torre ug Pagmata! ngadto sa mga lumalabay.
Si Brader Swingle maoy usa ka prangka, mabinationg tawo nga gikaangayan sa mga nakaila kaniya. Sama sa iyang amahan ug inahan, siya may pinasukad-sa-Bibliyang paglaom nga mabuhing kauban ni Jesu-Kristo sa langitnong Gingharian, usa ka paglaom nga kita masaligong iya nang naangkon karon.—1 Tesalonica 4:15-18; Pinadayag 14:13.
[Footnote]
a Nagpasabot kini nga mamatay samtang ang usa aktibo gihapon sa buluhaton.
[Hulagway sa panid 31]
Si Brader Swingle nag-alagad ug mga 25 ka tuig sa departamento sa paghimog tinta
[Hulagway sa panid 31]
Si Lyman ug Crystal kanunayng magkuyog