“Tinuod Bang Sunogon sa Diyos ang mga Tawo Ingong Silot Diha sa Impiyerno?”
“Nagtuon ba kamog teolohiya?”
Kining pangutanaha nakapakurat kang Joel ug Carl. Ang maong duha ka batan-ong lalaki—nag-alagad ingong mga boluntaryo sa hedkuwarter sa mga Saksi ni Jehova sa Brooklyn, New York—nagbasabasa sa duol nga tindahag libro. Samtang gisusi ni Joel ang mga konkordansiya sa Bibliya, giasoy ni Carl kaniya ang usa ka panaghisgot nga iyang nasinati diha sa kanataran. Kay nadunggan ang ubang bahin sa ilang giestoryahan, usa ka tawo nga nagtindog sa duol nainteres sa pagduol kanila.
Apan, ang tawo may labawng personal nga gikabalak-an kay sa pagkasayod lamang kon ang duha nagtuon bag teolohiya. Siya misaysay: “Usa ako ka Hudiyo, ug giingnan ako sa pipila ko ka higalang mga Kristiyano nga ako sunogon sa impiyerno kay gisalikway sa mga Hudiyo si Jesus. Nahasol kaayo ako niini. Ang maong silot nga gikan sa usa ka mahigugmaong Diyos morag dili makataronganon. Tinuod bang sunogon sa Diyos ang mga tawo ingong silot diha sa impiyerno?”
Giingnan ni Joel ug Carl kining sinserong tawo nga sila maoy matinuorong mga estudyante sa Bibliya. Ilang gipakita kaniya gikan sa Kasulatan nga ang mga patay walay nahibaloan ug sila natulog lamang diha sa kamatayon nga nagpaabot sa pagkabanhaw. Busa, sila dili makasinati ug pagsakit o mag-antos sa impiyernong-kalayo. (Salmo 146:3, 4; Ecclesiastes 9:5, 10; Daniel 12:13; Juan 11:11-14, 23-26) Human sa ilang 45-minutos nga panagsultihay, gihatag sa maong tawo ang iyang adres ngadto kang Joel ug Carl ug naghangyog dugang impormasyon sa maong ulohan.
Kon ang impiyerno usa pa ka dapit sa kalayonhong pagsakit, aduna kahay mohangyo nga ipadala didto? Apan, ang patriarkang si Job, nga nangandoy nga makalingkawas gikan sa iyang kahimtang, mihangyo: “Kinsay mohatag kanako niini, nga ikaw magpanalipod unta kanako didto sa impiyerno, ug tagoan ako hangtod molabay na ang imong kasuko?” (Job 14:13, Douay Version) Tin-aw nga si Job wala magtuo nga ang impiyerno maoy usa ka dapit sa pagsakit. Hinunoa, gitinguha niyang mapanalipdan didto. Ang kamatayon maoy usa ka kahimtang sa pagkawala-maglungtad, ug ang impiyerno sa Bibliya mao ang komon nga lubnganan sa katawhan.
Kon buot nimo ang dugang nga impormasyon bahin sa kon unsay mahitabo kanato sa dihang kita mamatay ug kon unsay paglaom nga mabatonan human sa kamatayon, ikaw mainitong gidapit nga mosanong sa mosunod nga tanyag.