“Pinaagi sa Kahayag nga Gikan Kanimo Kami Makakita ug Kahayag”
ANG kahayag maoy usa ka butang nga sagad atong gibalewala hangtod mapalong ang koryente ug ang atong kasilinganan kalit nga mongitngit. Ikalipay nga ang atong langitnong “planta sa elektrisidad”—ang adlaw—bug-os nga kasaligan. Ug tungod sa kahayag gikan sa adlaw, kita makakita, makakaon, makaginhawa, ug mabuhi.
Sanglit ang kahayag gikinahanglan aron mabuhi, dili kita matingala nga mabasa diha sa Genesis nga ang kahayag mitungha sa unang adlaw sa paglalang. “Ang Diyos miingon: ‘Motungha ang kahayag.’ Niana mitungha ang kahayag.” (Genesis 1:3) Ang diyosnong mga tawo sama kang Haring David miila gayod kang Jehova ingong tuboran sa kinabuhi ug kahayag. “Anaa kanimo ang tuboran sa kinabuhi,” misulat si David. “Pinaagi sa kahayag nga gikan kanimo kami makakita ug kahayag.”—Salmo 36:9.
Ang mga pulong ni David parehong mapadapat sa literal ug sa mahulagwayong paagi. Ang Encyclopædia Britannica nag-ingon: “Ang kahayag mao gayod ang hinungdan nga kita makakita.” Dayon kini midugang: “Mas daghang impormasyon ang makaabot sa utok sa tawo pinaagi sa mga mata kay sa uban pang mga igbalati.” Sanglit kadaghanan sa atong makat-onan nag-agad sa gasa sa panan-aw—nga nagkinahanglag kahayag aron makaobra sa hustong paagi—ang kahayag gigamit usab diha sa Kasulatan sa mahulagwayong paagi.
Busa, si Jesus miingon sa iyang mga tinun-an: “Ako mao ang kahayag sa kalibotan. Siya nga magasunod kanako dili gayod magalakaw sa kangitngit, apan makabaton sa kahayag sa kinabuhi.” (Juan 8:12) Ang mahulagwayong kahayag nga gitumong ni Jesus mao ang mensahe sa kamatuoran nga iyang giwali, nga makalamdag sa hunahuna ug kasingkasing sa iyang mga mamiminaw. Human sa mga tuig sa espirituwal nga kangitngit, sa kataposan nasabtan sa mga tinun-an ni Jesus ang katuyoan sa Diyos alang sa katawhan ug ang paglaom sa Gingharian. Kini mao gayod ang “kahayag sa kinabuhi,” sanglit ang maong kahibalo mahimong motultol sa kinabuhing dayon. “Kini nagkahulogan ug kinabuhing walay kataposan,” matod ni Jesus diha sa pag-ampo ngadto sa iyang langitnong Amahan, “ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Hinaot nga dili gayod nato ibalewala kining espirituwal nga kahayag!