“Gitultolan Niya Ako sa Daplin sa Malinawng Tubig”
TUNGOD sa mainit nga klima sa kayutaan sa Bibliya, ang mga karnero kinahanglang moinom adlaw-adlaw. Busa, ang usa ka hinungdanong bahin sa buluhaton sa magbalantay mao ang pagpainom sa iyang panon sa mga hayop. Usahay ang mga magbalantay magpainom sa ilang mga panon sa hayop ug tubig gikan sa atabay, nga magbubo sa tubig ngadto sa mga biawan aron makainom ang mga karnero. (Genesis 29:1-3) Apan, panahon sa ting-ulan, ang mga dapit palibot sa gagmayng mga sapa ug mga suba nagtaganag “mga dapit-pahulayan nga maayong pagkatubig” ug malinaw.—Salmo 23:2.
Ang usa ka maayong magbalantay kinahanglang mahibalo kon hain makaplagan ang tubig ug maayong sibsibanan alang sa iyang panon sa mga hayop. Ang iyang pagkasinati sa usa ka dapit mogarantiya sa kaluwasan sa iyang mga karnero. Si David, kinsa migugol ug daghang katuigan sa pag-alima ug mga karnero didto sa kabungtoran sa Judea, nagtandi sa espirituwal nga paggiya sa Diyos ngadto sa usa ka magbalantay nga nagtultol sa iyang mga karnero ngadto sa lunhawng mga sibsibanan ug sa nagahatag ug kinabuhi nga tubig. “Gitultolan niya ako sa daplin sa malinawng tubig,” matod ni David sumala sa usa ka hubad.—Salmo 23:1-3, Ang Biblia NCV.
Katuigan sa ulahi, pinaagi sa iyang manalagna nga si Ezequiel, si Jehova migamit ug susamang ilustrasyon. Siya misaad nga iyang tigomon ang iyang katawhan gikan sa kayutaan diin sila nagkatibulaag, sama sa usa ka magbalantay nga nagtigom sa iyang mga karnero. “Dad-on ko sila ngadto sa ilang yuta ug pakan-on ko sila sa ibabaw sa kabukiran sa Israel, daplin sa kasapaan,” siya nagpasalig kanila.—Ezequiel 34:13.
Si Jehova nga Diyos maikagon usab kaayo kon bahin sa pagtaganag espirituwal nga tubig. Ang basahon sa Pinadayag naghubit sa “usa ka suba sa tubig sa kinabuhi” nga nagaagos gikan sa trono sa Diyos. (Pinadayag 22:1) Ang tanang tawo gidapit sa pag-inom gikan niining subaa. ‘Si bisan kinsa nga may tinguha makainom sa tubig sa kinabuhi nga walay bayad.’—Pinadayag 22:17.
Kining simbolikong tubig sa kinabuhi naghawas sa mga kahikayan sa Diyos alang sa kinabuhing walay kataposan. Si bisan kinsa makasugod sa pag-inom sa maong tubig pinaagi sa ‘pagkuha ug kahibalo bahin sa bugtong matuod nga Diyos ug sa usa nga iyang gipadala, si Jesu-Kristo.’—Juan 17:3.