“Duha ka Babaye Nanuktok sa Among Pultahan”

“NAGUOL kaayo mi sa dihang namatay ang among gamayng anak nga babaye duha ka tuig nang milabay.” Mao kini ang unang mga pulong sa usa ka sulat nga gipatik diha sa Le Progrès nga mantalaan, sa Saint-Étienne, Pransiya.

“Tulo ka bulan ang edad ni Mélissa ug nag-antos sa grabeng sakit nga trisomy 18. Dili ka gayod maulian sa ingon niini nga trahedya nga daw dili makataronganon. Bisan tuod gimatuto kami ingong Katoliko, mosantop kanunay sa among hunahuna ang pangutana, ‘Diyos ko, kon ugaling naglungtad ka man, nganong gitugotan nimo nga mahitabo kini?’” Tin-aw nga ang inahan nga misulat mibatig kasubo ug kawalay mahimo. Ang iyang sulat nagpadayon:

“Wala madugay tapos niadtong mga hitaboa, duha ka babaye nanuktok sa among pultahan. Nailhan dayon nako sila nga mga Saksi ni Jehova. Balibaran na unta nako sila sa matinahorong paagi, apan namatikdan nako ang usa ka brosyur nga ilang gitanyag. Kadto maoy mahitungod sa kon nganong gitugotan sa Diyos ang pag-antos. Busa nakahukom ako sa pagpasulod kanila sa tuyo nga pamatud-ang sayop sila. Akong gihunahuna nga kon mahitungod sa pag-antos, grabe gayod ang naagomang pag-antos sa akong pamilya ug gisumhan na mi sa kanunay namong madungog nga mga pulong sama sa ‘Gihatag siya sa Diyos kanamo, ug ang Diyos nagkuha kaniya.’ Nagpabilin ang mga Saksi nga sobrag diyutay sa usa ka oras. Naminaw sila kanako nga naluoy kaayo, ug sa dihang nanglakaw na sila, miarang-arang gayod ang akong gibati nga misugot akong duawon pag-usab. Kini nahitabo duha ka tuig nang milabay. Wala ako mahimong Saksi ni Jehova, apan nagsugod ako sa pagtuon ug Bibliya uban kanila, ug tigtambongan ako sa ilang mga tigom kon makahimo ako.”