“Duol sa Diyos, ug Siya Moduol Kaninyo”

Kaniadto ug Karon—Kon sa Unsang Paagi ang Bibliya Nakapabag-o Niining Tawhana

ANG musika mao ang labing importante sa kinabuhi ni Rolf-Michael. Ang droga mao ang iyang gikalingahan. Sa bata pa didto sa Alemanya, kusog kaayo siyang moinom ug alkoholikong ilimnon ug walay kutokuto sa paggamit ug LSD, cocaine, hashish, ug ubang mga substansiya nga makaapektar sa hunahuna.

Samtang nagpayuhot ug droga diha sa usa ka nasod sa Aprika, si Rolf-Michael nadakpan ug napriso sulod sa 13 ka bulan. Sa dihang napriso, nakabaton siya ug panahon sa pagpamalandong bahin sa tinuod nga katuyoan sa kinabuhi.

Si Rolf-Michael ug ang iyang asawa, si Ursula, nangita gayod sa kahulogan sa kinabuhi ug sa kamatuoran. Bisan pa sa dili maayong mga kasinatian uban sa mga relihiyon nga nag-angkong Kristohanon, buot gayod sila nga makaila sa Diyos. Apan sila dunay mga pangutana pero walay nadawat nga makapatagbawng mga tubag gikan sa nagkalainlaing relihiyosong mga grupo. Dugang pa, kining mga relihiyona wala maghatag ug kusganong panukmod sa pagpalihok kanila sa pag-usab sa ilang mga kinabuhi.

Si Rolf-Michael ug si Ursula sa ngadtongadto nakahibalag ug mga Saksi ni Jehova. Human makasugod sa pagtuon sa Bibliya, si Rolf-Michael natandog pag-ayo sa tambag: “Duol sa Diyos, ug siya moduol kaninyo.” (Santiago 4:8) Siya desidido sa ‘paghukas sa daan nga pagkatawo nga nahiuyon kanhi sa iyang paagi sa panggawi ug sa pagsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’—Efeso 4:22-24.

Sa unsang paagi gisul-ob ni Rolf-Michael ang bag-ong personalidad? Siya gipakitaan gikan sa Bibliya nga “pinaagi sa tukmang kahibalo” ang personalidad sa tawo mahimong ‘mabag-o sumala sa larawan sa Usa nga naglalang niini,’ nga mao, si Jehova nga Diyos.—Colosas 3:9-11.

Samtang nagtuon siya sa tukmang kahibalo, naningkamot si Rolf-Michael sa pagpahiuyon sa iyang kinabuhi sa mga prinsipyo sa Pulong sa Diyos. (Juan 17:3) Lisod ang paghunong sa paggamit ug droga, apan nasabtan ni Rolf-Michael ang bili sa pagduol kang Jehova diha sa pag-ampo ug sa pagtagamtam sa iyang tabang. (1 Juan 5:14, 15) Dugang tabang ang miresulta tungod sa suod nga pagpakig-uban sa mga Saksi ni Jehova, kinsa naningkamot sa pagtuman sa kabubut-on sa Diyos.

Ang pagkahibalo nga ang kalibotan lumalabay ug nga kadtong nagtuman sa kabubut-on sa Diyos maoy magpabilin sa walay kataposan nakatabang usab kang Rolf-Michael. Kini nakatabang kaniya sa pagpili, dili sa lumalabay nga gugma sa kalibotan, kondili sa walay kataposang panalangin sa pagkabaton ug suod nga relasyon sa mahigugmaong Diyos, si Jehova. (1 Juan 2:15-17) Si Rolf-Michael natandog gayod sa mga pulong sa Proverbio 27:11: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.” Siya mapasalamatong miingon: “Kining bersikuloha nagpakita sa lalom nga gugma ni Jehova, kay iyang gihatagan ug higayon ang tawo sa paglipay sa iyang kasingkasing.”

Sama kang Rolf-Michael, sa iyang asawa, ug sa ilang tulo ka anak, gatosan ka libo ang nakapahimulos sa pagsunod sa mga prinsipyo sa Bibliya. Ang maong mga tawo makita diha sa mga kongregasyon sa mga Saksi ni Jehova sa tibuok kalibotan. Ikasubo, diha sa ubang mga nasod ang mga Saksi bakak nga giakusar nga usa ka peligrosong sekta nga magbungkag sa mga pamilya. Ang kasinatian ni Rolf-Michael nagpadayag nga kini dili tinuod.—Hebreohanon 4:12.

Si Rolf-Michael miingon nga ang Mateo 6:33, nga nagtambag kanato sa pag-una sa espirituwal nga mga butang, mao ang ‘giya’ sa iyang pamilya, nga nagtudlo kanila sa hustong direksiyon. Siya ug ang iyang pamilya mapasalamaton kaayo kang Jehova tungod sa malipayong pamilya nga ilang ginatagamtam ingong mga Kristohanon. Sama sila ug gibati sa salmista kinsa miawit: “Unsay akong igabayad kang Jehova tungod sa tanan niyang mga kaayohan kanako?”—Salmo 116:12.

[Blurb sa panid 9]

Gihatagan sa Diyos ug higayon ang tawo sa paglipay sa iyang kasingkasing

[Kahon sa panid 9]

Epektibo nga mga Prinsipyo sa Bibliya

Lakip sa mga prinsipyo sa Bibliya nga nakapalihok sa daghan sa paghunong sa makamatayng pagkagiyan mao ang mga mosunod:

“Oh kamong mga nahigugma kang Jehova, dumti ninyo ang daotan.” (Salmo 97:10) Human makombinsir nga daotan ang makamatayng mga buhat ug human makaugmad ug tinuod nga pagdumot niini, ang tawo dili na maglisod sa pagpahimuot sa Diyos.

“Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Proverbio 13:20) Aron makahunong sa paggamit ug droga ug ubang mga substansiya nga makagiyan, kinahanglang pilion ug maayo sa tawo ang iyang mga kauban. Ang pagpakigsuod uban sa mga Kristohanon nga motabang kaniya sa iyang hukom sa paghunong sa paggamit ug droga mapuslanon gayod.

“Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Ang maong kalinaw sa kasingkasing ug hunahuna dili mabatonan sa bisan unsang mga paagi. Ug ang maong pagsalig sa Diyos pinaagi sa pag-ampo makatabang sa tawo sa pag-atubang sa mga problema sa kinabuhi nga dili kinahanglang mogamit ug makagiyan nga mga droga.