Tingpangaon—Dili Lang Panahon sa Pagpangaon!
ANG tanan gustog lamiang pagkaon. Ug kon panahon sa pagpangaon adunay maayong pag-estoryahanay ug mainitong pakig-ubanay sa mga tawong imong gihigugma, kini mahimong usa ka makapalipayng okasyon nga motagbaw dili lamang sa atong kagutom. Gibatasan sa daghang pamilya ang pagtapok labing menos kas-a sa usa ka adlaw aron magkadungan sila sa pagpangaon. Ang panahon sa pagpangaon naghatag sa pamilya ug kahigayonan sa paghisgot sa mga hitabo o sa mga plano sa maong adlaw. Ang mga ginikanan nga mamati sa isulti ug ipadayag sa ilang mga anak makakuhag ideya bahin sa hunahuna ug pagbati sa ilang mga bata. Sa paglabay sa panahon, ang malipayon ug relaks nga pag-ubanay panahon sa pagpangaon makapalambo sa pagbati sa kasegurohan, pagsalig, ug gugma sulod sa pamilya nga makapalig-on sa pamilya.
Karon, tungod kay daghang membro sa pamilya ang kanunayng puliki ug okupado, maglisod sila sa pagpahigayon ug panahon aron magkaubanay sa pagpangaon. Sa ubang mga dapit sa kalibotan, ang pamilya nga magtapok sa pagpangaon o mag-estoryahanay panahon sa pagpangaon dili dalawaton sa lokal nga kultura. Gibatasan sa ubang mga pamilya ang pagtan-awg TV panahon sa pagpangaon, ug tungod niini nawad-an sila ug kahigayonan alang sa makahuloganong komunikasyon.
Apan, ang Kristohanong mga ginikanan kanunayng alisto sa pagpangitag mga kahigayonan sa pagpalig-on sa ilang panimalay. (Proverbio 24:27) Dugay na kanhi, ang mga ginikanan gisultihan nga ang labing maayong mga kahigayonan sa pagtudlo sa pulong sa Diyos ngadto sa ilang mga anak mao ang ‘mga panahon nga sila maglingkod sa ilang balay.’ (Deuteronomio 6:7) Ang regular nga pagdungan sa pagpangaon mohatag sa mga ginikanan ug talagsaong higayon sa pagtabang sa ilang mga anak nga makabaton ug mas lalom nga gugma alang kang Jehova ug sa iyang matarong nga mga prinsipyo. Pinaagi sa pag-ugmad ug usa ka makapalipay ug relaks nga atmospera, imong mahimo ang panahon sa pagpangaon nga usa usab ka makapalipay ug makapadasig nga okasyon alang sa imong pamilya. Oo, himoa ang tingpangaon nga dili lang panahon sa pagpangaon!