Usa ka Mapainubsanong Aprikano nga Nahigugma sa Pulong sa Diyos

ANG mga bisita sa Aprika sagad mahingangha nga dali ra kaayong makasugod ug panaghisgot bahin sa mga topiko sa Bibliya uban sa lokal nga mga tawo. Ang mga pangutanang sama sa, “Unsa ang Gingharian sa Diyos?” o “Aduna bay dumalayong sulbad sa mga problemang sama sa kanihit sa pagkaon, sakit, gubat, ug krimen?” dali rang makadani sa mga tawo sa pagpaminaw. Daghan ang malipayong motugot sa usa ka estranyo sa pagpakita kanila sa mga tubag gikan sa Bibliya. Kini subsob moresulta sa regular nga pagtuon sa Bibliya. Ug samtang ang ginatun-an mouswag sa espirituwal, sila mahimong bawtismadong mga Kristohanon.

Usa sa unang mga Aprikano nga misanong nianang paagiha gihisgotan diha sa Bibliya sa Buhat 8:26-40. Siya usa ka Etiopianhong lalaki nga miadto sa Jerusalem aron sa pagsimba sa matuod nga Diyos, si Jehova.

Ingon sa gipakita sa hulagway sa ubos, ang Etiopianhong lalaki mouliay na sakay sa iyang karwahe, nga nagbasag usa ka linukot nga basahon. Usa ka estranyo miduol kaniya ug nangutana: “Nakasabot ka ba gayod sa imong ginabasa?” Sa kamapaubsanon, ang Etiopianhon miingon nga nanginahanglan siyag tabang ug mihangyo sa estranyo, ang Kristohanong ebanghelisador nga si Felipe, sa pagsakay sa karwahe. Dayon iyang gihangyo si Felipe sa pagpatin-aw sa usa ka teksto sa Kasulatan nga bag-o lang niyang gibasa. Gipatin-aw ni Felipe nga kadto mao ang tagna nga nagtumong sa di pa dugayng kamatayon sa Mesiyas, si Jesu-Kristo. Gisaysay usab ni Felipe ang uban pang mga butang nga nalangkit sa “maayong balita bahin kang Jesus,” nga sa walay duhaduha naglakip sa pagkabanhaw ni Jesus.

Human madungog kining kahibulongang mga kamatuoran, ang Etiopianhon buot mahimong tinun-an ni Jesus ug nangutana: “Unsay nakapugong kanako nga mabawtismohan?” Human sa iyang bawtismo, kining mapainubsanong Aprikano malipayong mipauli sa iyang balay, ug wala nay gisulti ang Bibliya bahin kaniya.

Karon, ang mga Saksi ni Jehova nagatabang sa milyonmilyong tawo sa tibuok kalibotan sa pagkakat-on bahin sa mao gihapong “maayong balita.” Duolan sa unom ka milyong libreng pagtuon sa Bibliya sa balay ang ginadumala sa pagkakaron.