Usa ka Pagduaw nga Nagpahinabog Bug-os nga Kausaban
“NAGHINAMHINAM ako sa pagsulti sa akong pamilya bahin sa duha ka ‘anghel’ nga gipadala sa Diyos kanako.” Mao kanay gisulat sa usa ka lalaki nga giduaw sa duha ka batan-ong babaye nga mga Saksi ni Jehova. Pipila ka semana una pa sa ilang pagduaw, ang iyang asawa nga iyang nakauban sulod sa 45 ka tuig namatay. Siya nahugno. Ang iyang hamtong na nga mga anak naghupay kaniya, apan layo ang ilang gipuy-an. Walay miduaw kaniya nga mga higala ug mga silingan.
“Dili na ako tig-ampoan kay daw layo na ako sa Diyos,” giingnan sa lalaki ang batan-ong mga babaye sa dihang giduaw nila siya. Apan, sila mabination ug nagbilin kaniyag usa ka gamayng tract nga pinasukad sa Bibliya nga may ulohang Unsay Paglaom Alang sa Namatay nga mga Minahal? Iya kanang gibasa nianang gabhiona ug siya nahupayan.
Wala madugay sa ulahi, ang duha ka Kristohanong mga babaye namalik. Ilang gisultihan siya nga sila mibalik aron komostahon siya tungod kay hilabihan ang iyang kasubo sa una nilang pagduaw kaniya. “Nakurat ako,” misulat ang maong lalaki sa ulahi, “nga ang duha ka babaye nga dili nako kaila kaniadto nahingawa kanako ug naghunahuna sa akong kaayohan.” Siya nadasig sa mga punto nga ilang gipaambit kaniya gikan sa Bibliya. Ang mga babaye misaad nga sila moduaw pag-usab. Ang lalaki nalipay ug natukmod sa pagsulat sa mga komento nga gihisgotan sa itaas diha sa sulat nga iyang gipadala ngadto sa usa ka lokal nga Kingdom Hall sa mga Saksi ni Jehova.
Sa wala pa siya mobalhin sa dapit nga duol sa usa sa iyang mga anak, kining tawhana mitambong sa Kristohanong tigom sa mga Saksi ni Jehova ug nakig-uban sa pamilya sa usa sa batan-ong mga babaye sa pagpangaon. Siya misulat: “Ako mobiya na niining dapita, apan kadtong batan-ong mga babaye ug ang inyong simbahan magpabilin dinhi sa akong kasingkasing ug sa akong mga pag-ampo. Oo, ako karon kanunay nang nagaampo. Ako nakahimog bug-os nga kausaban. Ang batan-ong mga babaye dakog naamot niana, ug ako mapasalamaton kanila hangtod sa hangtod.”