“Sukad Karon, Motuo na Gayod Ko nga Adunay Diyos”

ANG usa ka babayeng taga-Ukraine nga ginganlag Alexandra, nga nagpuyo sa Prague, Czech Republic, nagpadulong na sa ilaha gikan sa trabaho. Diha sa hunonganan ug bus, iyang namatikdan ang usa ka porpolyo sa yuta nga gisindolsindolan lang sa mga nanglabay. Sa dihang iyang gipunit kadto ug gitan-aw ang sulod, nakuratan siya sa iyang nakita. Dunay hinapnig nga 5,000 nga kuwartang koruna! Morag walay tawo nga nangita niana sa iyang palibot. Ingong langyaw nga nagpuyo sa Czech Republic, si Alexandra nagkalisod gayod sa pagpanginabuhi. Unsay iyang buhaton?

Sa pag-abot niya sa iyang balay, gipakita ni Alexandra ang maong porpolyo ngadto sa iyang anak babaye nga si Victoria. Giukay nila ang sulod niini aron mangitag ngalan ug adres sa tag-iya niini apan wala silay nakita. Hinunoa, kini dunay usa ka papel nga may pipila ka numero nga nasulat niana. Sa usa ka bahin sa maong papel may nasulat nga numero sa deposito sa bangko, ug may daghan pang numero sa laing bahin. Kini naundan usab ug mga direksiyon sa usa ka lokal nga bangko ug may sinulat sa papel nga nag-ingon “330,000 koruny” (mga $10,000, U.S.). Kana ang eksaktong kantidad sa kuwarta sa maong porpolyo.

Ginamit ang gituohan niyang numero sa telepono, wala makontak ni Alexandra ang bangko. Busa iyang giadto uban sa iyang anak ang bangko ug gipatin-aw ang nahitabo. Nangutana sila bahin sa numero sa deposito sa bangko nga ilang nakita sa porpolyo. Apan, ang bangko walay rekord sa maong deposito. Pagkasunod adlaw, mibalik si Alexandra uban ang laing numero nga didto sa maong porpolyo. Aw, ang maong bangko may usa ka kliyenteng babaye nga nanag-iya sa maong numero. Gikontak ni Alexandra ug ni Victoria ang maong babaye, ug iyang gipamatud-an nga nawad-an siya sa maong kantidad. Sa dihang nagkita ra gayod sila, mainiton silang gipasalamatan sa babaye ug siya nangutana, “Unsa may akong iganti sa pag-uli ninyo sa kuwarta?”

Si Victoria mitubag: “Wala lang. Kon gitinguha pa namo ang kuwarta, amo na unta kanang gihiposan.” Sa iyang limitadong pagsulti ug Czech, siya miingon: “Among giuli ang kuwarta kanimo kay kami mga Saksi ni Jehova. Ang among nabansay-sa-Bibliya nga tanlag dili makatugot kanamo sa paghipos sa butang nga dili amoa.” (Hebreohanon 13:18) Ang babaye malipayong miingon, “Sukad karon, motuo na gayod ko nga adunay Diyos.”