Mga Batan-on—Apektado Ninyo ang Kasingkasing sa Inyong mga Ginikanan
“WALA nay labaw nga hinungdan sa akong pagkamapasalamaton kay niining mga butanga, nga akong madungog nga ang akong mga anak nagpadayon sa paglakaw diha sa kamatuoran,” misulat ang tigulang nang apostol nga si Juan. (3 Juan 4) Bisag ang mga anak nga gihisgotan niining tekstoha sa Bibliya nagtumong sa Kristohanong mga tinun-an, ang usa ka mahinadlokon-sa-Diyos nga ginikanan mobati usab nianang gipahayag ni Juan. Maingon nga apektado gayod sa mga ginikanan ang kinabuhi sa ilang mga anak, ang mga anak dako usab ug epekto sa kinabuhi sa ilang mga ginikanan.
Si Haring Solomon sa Israel nakamatikod kon unsa ka dako ang epekto nga mahimo sa mga anak ngadto sa ilang mga ginikanan. Siya misulat: “Ang anak nga maalamon maoy usa nga makapalipay sa iyang amahan, ug ang anak nga hungog maoy kaguol sa iyang inahan.” (Proverbio 10:1) Busa, ang tanang anak—bisan kadtong mga hingkod na—angayng magtagad sa epekto sa ilang mga panggawi ngadto sa ilang amahan ug inahan. Nganong nahiangay kini?
Hunahunaa ra ang pag-atiman nga gihimo sa imong mahinadlokon-sa-Diyos nga mga ginikanan sa pagpadako kanimo! Sila mibati nag kabalaka ug nag-ampo alang kanimo bisan sa wala ka pa matawo. Sa dihang natawo ka na, ang imong mga ginikanan nalipay sa pag-ugmad ug suod nga relasyon uban kanimo ug lagmit nagpasalamat sila sa Diyos tungod sa talagsaon—apan seryoso—nga pribilehiyo ug responsabilidad sa pagkaginikanan. Duna na silay atimanon nga usa ka masuso, ug ingong mga magsisimba ni Jehova, seryoso nila kining gitagad.
Sanglit ang imong mga ginikanan maoy matuod nga mga Kristohanon, sila miliso sa Bibliya ug sa binase-sa-Bibliyang mga literatura alang sa kasaligang giya, ug sila nangayog tambag niadtong nakamatuto nag mga anak. Sila usab nagpadayon sa pagpahayag sa ilang mga kabalaka ngadto sa Diyos pinaagi sa pag-ampo. (Maghuhukom 13:8) Samtang nagdako ka, ang imong mga ginikanan nahibalo sa imong maayong mga hiyas maingon man sa imong mga kasaypanan. (Job 1:5) Sa nagtin-edyer ka na, mitungha ang dugang mga problema. Tingali rebelyoso ka usahay, ug ang imong mga ginikanan migugol ug dugang panahon sa pag-ampo, pagbasa, ug sa paghunahuna kon sa unsang paagi matabangan ka nga makapadayon sa pag-alagad sa imong langitnong Amahan, si Jehova.
Ang imong mga ginikanan dili gayod moundang sa ilang pagkainahan o pagkaamahan. Padayon silang maghunahuna sa imong kaayohan sa pisikal, mental, emosyonal, ug espirituwal bisan sa dihang mohingkod ka na. Apan, kanunayng anaa sa ilang hunahuna nga ikaw libreng makahimog kaugalingong desisyon ug dili gayod maseguro kon unsay dangatan sa imong kinabuhi ugma-damlag. Ngadtongadto, ikay magbuot kon unsang dalana ang imong subayon.
Busa, kon ikaingon nga ‘wala nay labaw nga hinungdan sa pagkamapasalamaton’ sa mga ginikanan kay sa pagkadungog nga ang ilang mga anak “nagpadayon sa paglakaw diha sa kamatuoran,” dili ba tinuod usab nga sukwahi niana ang bation sa mga ginikanan kon ang ilang mga anak dili magmaalamon? Sa pagkatinuod, ang mga anak nga mogawing di-maalamon maghatag ug kaguol sa ilang mga ginikanan. Si Solomon miingon: “Ang anak nga hungog maoy kaguol sa iyang amahan ug kapaitan alang sa nanganak kaniya.” (Proverbio 17:25) Grabe gayod ang kasakit nga bation sa mga ginikanan kon ang anak mobiya sa pagsimba sa matuod nga Diyos!
Tin-aw nga dako kag impluwensiya sa inyong pamilya ug sa uban pa. Ang imong panggawi makaapektar gayod sa kasingkasing sa imong mga ginikanan. Kon imong isalikway ang Diyos ug ang iyang mga prinsipyo, mag-antos ang imong mga ginikanan. Apan tinuod usab ang katugbang niana. Kon magpabilin kang matinumanon ug masinugtanon kang Jehova, malipay ang imong mga ginikanan. Magmadeterminado nga lipayon ang kasingkasing sa imong mga ginikanan! Aduna pa bay mas bililhong gasa nga ikahatag nimo ngadto kanilang nagpadako, nanalipod, ug nagmahal kanimo?