Hinungdanong mga Pagtulon-an Alang sa mga Bata

SI Gladys nagtrabaho sa usa ka eskuylahan sa Mendoza, Argentina. Usa ka adlaw niana, pag-agi niya sa usa ka klasrom, iyang nakita nga gibasahan sa maestra ug libro nga Ang Akong Basahon sa mga Estorya sa Bibliya ang iyang mga estudyante nga anaa sa ikaupat nga ang-ang sa elementarya.a Gipailaila ni Gladys ang iyang kaugalingon nga usa sa mga Saksi ni Jehova ug iyang gipakita sa maestra kon sa unsang paagi epektibong magamit ang maong libro. Kay nakauyon sa gipatin-aw ni Gladys kaniya, gusto sa maestra nga himoon kining bahin sa leksiyon sa eskuylahan. Apan, kinahanglang ipananghid niya kini sa mga tagdumala sa eskuylahan. Nalipay kaayo siya sa dihang giaprobahan ang iyang hangyo.

Dayon, pag-abot sa linaing adlaw nga ilabinang gigahin sa eskuylahan sa pagdasig sa mga bata sa pagbasa ug libro, gipabasa sa maestra sa iyang mga estudyante ang usa ka kapitulo sa maong libro atubangan sa ilang mga eskolmet. Tungod sa maayong epekto niini diha sa mga bata, ang maestra gidapit sa usa ka estasyon sa telebisyon sa maong dapit aron interbiyohon. Sa dihang iyang gihisgotan ang bahin sa paggawi sa iyang mga estudyante, ang tig-interbiyo nangutana kaniya, “Unsa may imong gihimo sa mga bata sa imong klasrom aron magbinuotan sila?” Ang maestra nag-ingon nga iyang gigamit ang libro nga nag-ulohang Ang Akong Basahon sa mga Estorya sa Bibliya. Iyang gipatin-aw nga bisan tuod wala siya magtudlog relihiyon sa iyang klase, apan pinaagi sa maong libro, iyang natudlo kanila ang maayong mga pagtulon-an sama sa pagkamatinahoron, pagpailob, pakigdinaitay, pagtinabangay, pagkamasinugtanon, ug pagpakitag gugma. Uyon ang tanan nga kining hinungdanong mga pagtulon-an angayng makat-onan sa mga bata.

Gusto ka bang makakat-on niana nga mga pagtulon-an ang imong mga anak? Mahimo kang mohangyo ug kopya sa mga Saksi ni Jehova niining maayo kaayong libro nga Ang Akong Basahon sa mga Estorya sa Bibliya.

[Footnote]