Posible ba nga Mahiusa ang Kalibotan?

UNSAY dulnganan sa kalibotan—kalinaw o kalaglagan? Dunay moingon nga hapit nang maangkon ang kalinaw. Apan, may nagtuo usab nga kini nag-ungaw sa kalaglagan.

Sa usa ka bahin, ang pipila ka lider sa kalibotan masaligon kaayo nga maangkon ang kalinaw sa tibuok kalibotan. Tingali nahadlok silang maghunahuna sa mahimong dangatan sa kalibotan kon kini dili magmalinawon. Sa pikas bahin, daghan ang nabalaka pag-ayo nga naghunahuna niining mga pangutanaha: Unsang mga nasora ang adunay nukleyar nga mga armas? Mangahas kaha sila sa paggamit niini? Unsa kahay mahitabo kon ila kining gamiton?

Gipakita sa kasaysayan nga ang pag-indigay ug pagpihigpihig maoy pangunang hinungdan kon nganong wala mahiusa ang kalibotan, ug sagad nga gisugnoran kana sa relihiyon. “Ang bisan unsa nga makapabahin sa mga tawo makapukaw sa kayugot, ug ang relihiyon maoy pangunang hinungdan nga magkabahinbahin ang mga tawo,” miingon ang magsusulat nga si James A. Haught. “Bisan pag nagtuo ang kadaghanan nga ang relihiyon makapahimo sa tawo nga ‘maayo,’ dayag nga kini nagtukmod sa pipila sa paghimog daotan kaayong mga buhat.” Ingon usab niana ang panglantaw sa awtor nga si Steven Weinberg. Siya miingon: “Relihiyon ang nakaingon kon nganong ang maayong mga tawo mobuhat ug daotan.”

Posible ba nga mahiusa ang kalibotan? Posible gayod! Apan ang makapahiusa niini dili ang tawo o ang mga relihiyon nga gitukod sa tawo, sama sa atong masayran sa sunod nga artikulo.

[Blurb sa panid 3]

Ang kalibotan ba sama sa usa ka granada nga mobutohay na?