Usa ka Maayong Solusyon

TULO ka batan-ong lalaki sa Sentral Aprika ang buot motambong sa distritong kombensiyon sa ilang dapit. Apan dili kini sayon kay kinahanglan pa silang mobiyaheg duolan sa 90 kilometros agi sa libaong ug abogon nga dalan, ug wala silay kasakyan. Unsay ilang himoon aron sila makatambong? Nakahunahuna sila nga mohulam ug tulo ka bisikleta, apan wala sila makakitag maayo nga bisikleta alang sa biyahe.

Nasayran sa usa ka ansiyano sa lokal nga kongregasyon ang ilang problema busa iyang gipahulam ang iyang bisikleta. Bisan tuod ug daan na kini apan magamit pa. Iya silang gitudloan kon unsay ilang gihimo kaniadto aron makatambong sa kombensiyon. Gisugyot niya nga magpulipuli silag gamit sa bisikleta. Simple kini nga solusyon apan nagkinahanglag maayong koordinasyon. Unsaon nila kini paghimo?

Aron dili kaayo init, migikan silag sayo sa buntag ug ilang gikarga ang ilang bagahe sa bisikleta. Ang usa mosakay sa bisikleta ug maoy mag-una, samtang ang duha magsunod ug paspas nga maglakaw. Human makadagan ug mga tunga sa kilometro, mohunong ang nagbisikleta ug iya kining isandig sa kahoy. Sa dili pa siya mobiya, iyang paneguroon nga malantaw sa iyang duha ka kauban ang bisikleta aron dili kini kawaton. Dayon, mopadayon siya paglakaw.

Sa dihang ang duha ka brader makaabot na sa bisikleta, ang usa mopuli ug sakay samtang ang usa mopadayon pagbaktas ug mga tunga sa kilometro hangtod sa iyang turno. Tungod sa maayong pagplano ug determinasyon, mga 60 kilometros na lang ang ilang gibaktas imbes 90 kilometros. Wala maanugon ang ilang kahago. Nahimamat nila ang ilang Kristohanong mga igsoon didto sa kombensiyon ug malipayon silang nakatambong niana. (Deut. 31:12) Niining tuiga, himoon ba nimo ang imong maarangan aron ikaw makatambong sa distritong kombensiyon sa inyong dapit?