Pagduaw sa Talagsaong Imprentahanan

LAGMIT dili kini ang unang higayon nga nakadawat ka niining magasina. Tingali duna nay mga Saksi ni Jehova nga nakaduaw sa inyong balay ug mitanyag kanimog mga magasin nga Ang Bantayanang Torre ug Pagmata! aron tabangan ka nga mas makasabot sa Bibliya. O tingali nakakita ka nag mga Saksi nga nagtanyag niining binase-sa-Bibliya nga mga basahon diha sa kadalanan o sa merkado. Sa pagkatinuod, kapin sa 35 ka milyong kopya niining magasina ang gipatik sa matag bulan, ug kini mao ang labing kaylap nga napanagtag nga relihiyosong magasin sa tibuok kalibotan.

Natingala ka ba kon asa ug kon sa unsang paagi gihimo kining mga magasina? Aron matubag kana, atong hisgotan ang usa sa daghang imprentahanan sa mga Saksi ni Jehova sa lainlaing nasod—ang buhatan sa Wallkill, New York, sa Amerika. Daghan sa magbabasa niining magasina dili makaadto didto, busa ang paghubit niini pinaagi sa pulong ug mga hulagway maghatag kaninyog impormasyon bahin sa maong buhatan.

Siyempre, sa dili pa imprentahon ang mga literatura, andamon una ang mga pamulong niini. Pinaagi sa kompiyuter, dawaton sa Graphics Department ang mga materyal nga imprentahon gikan sa Writing Department sa Brooklyn, New York. Kini gamiton sa paghimo ug mga printing plates o plato. Kada bulan, mga 1,400 ka rolyo sa papel ang ginadeliber sa imprentahanan sa Wallkill, ug kada adlaw, mga 80 ngadto sa 100 ka toneladang papel ang magamit. Ang maong mga rolyo, nga ang pipila niana motimbang ug kapin sa 1,300 kilos, gamiton diha sa lima ka dagkong web-offset nga mga makina. Pag-agi sa papel diha sa makina, kini imprentahan, putlon, ug pil-on aron mahimong mga signature. Ang usa ka signature gilangkoban ug 32 ka panid, sama niining magasin nga imong gibasa karon. Giunsa man pod paghimo ang mga libro? Sa bindery, tapoon ang mga signature aron mahimong mga libro. Ang usa sa duha ka bindery makahimog 50,000 ka gahig-hapin nga libro o 75,000 ka humok-ug-hapin nga libro sa usa ka adlaw. Ang usa pa ka bindery makahimog mga 100,000 ka humok-ug-hapin nga mga libro matag adlaw.

Sa 2008, kini nga imprentahanan nakahimog kapin sa 28,000,000 ka libro, ug ang kapin sa 2.6 ka milyon niini maoy Bibliya. Nianang tuiga, nakaimprenta usab ug 243,317,564 ka magasin. Ang buhatan nag-imprentag mga basahon nga binase sa Bibliya sa mga 380 ka pinulongan. Sa dihang maimprenta na ang mga basahon, unsay sunod nga himoon?

Ang buhatan makadawat ug mga order gikan sa 12,754 ka kongregasyon sa mga Saksi ni Jehova sa Amerika ug sa 1,369 ka kongregasyon sa Caribbean ug Hawaii. Ang Shipping Department mag-andam sa mga order ug magpadala niini ngadto sa lainlaing mga kongregasyon. Sa matag tuig, mga 14 milyones ka kilong mga basahon ang ginapadala ngadto sa mga kongregasyon sa Amerika.

Apan, ang mga makina dili mao ang labing hinungdanong bahin niini nga buhatan kondili ang mga tawo nga nagtrabaho dinhi. Adunay kapin sa 300 ka tawo nga nagtrabaho sa lainlaing departamento—sa Graphics, Scheduling, Pressroom, Bindery, ug Shipping. Tanan sila maoy mga boluntaryo ug walay suweldo—nga nagpangedaron gikan sa 19 ngadto sa 92.

Sila interesado gayod sa mga tawo—sa mga indibiduwal nga gustong matudloan, madasig, ug magiyahan sa mga prinsipyo sa Bibliya nga gihisgotan niining mga basahona. Kami naglaom nga usa ka sa maong mga indibiduwal. Kami naglaom usab nga ang mga basahon nga giimprenta dinhi makatabang kanimo sa padayong pagkat-on bahin kang Jehova nga Diyos ug kang Jesu-Kristo, nga motultol sa kinabuhing walay kataposan.—Juan 17:3.

[Mga hulagway sa panid 16]

[Tibuok-panid nga hulagway sa panid 17]