Pakigsuod sa Diyos
Si Jehova Nagpabili sa mga Maaghop
GARBO, kasina, ambisyon. Kini nga mga batasan komon kaayo sa mga tawo nga nagmalamposon niining kalibotana. Apan kana bang mga batasana makapasuod kanato kang Jehova nga Diyos? Dili gayod, tungod kay gusto ni Jehova nga magmaaghop ang iyang mga magsisimba. Kini dayag diha sa asoy nga mabasa sa Numeros kapitulo 12. Ang maong asoy nahitabo sa kamingawan sa Sinai, human maluwas ang mga Israelitas gikan sa Ehipto.
Si Miriam ug Aaron “misulti batok” sa ilang manghod nga si Moises. (Bersikulo 1) Imbes makigsulti sila kang Moises bahin sa problema, sila misulti batok kaniya, nga lagmit nagpakaylap sa ilang mga reklamo diha sa kampo. Si Miriam, nga maoy unang gihisgotan, lagmit mao ang nanguna niini. Ang unang hinungdan sa ilang pagreklamo mao ang pagpangasawa ni Moises ug usa ka babayeng Cusihanon. Nasina ba si Miriam nga basin malabwan siya niining babayhana, nga dili pa gyod Israelitas?
Duna pay laing hinungdan sa ilang pagreklamo. Si Miriam ug Aaron nagpunayg ingon: “Pinaagi ba lamang kang Moises nga si Jehova nakigsulti? Dili ba usab pinaagi kanato nga siya nakigsulti?” (Bersikulo 2) Dili kaha ang tinuod nga motibo sa ilang pagreklamo mao ang tinguha nga mainila ug makabaton ug mas labawng awtoridad?
Sumala sa asoy, dili si Moises ang mihimog aksiyon sa ilang pagreklamo. Dayag nga giantos lang niya ang ilang gibuhat. Ang iyang pagkamainantoson nagpamatuod sa giingon sa Bibliya nga siya ang “labing maaghop sa tanang tawo” sa yuta.a (Bersikulo 3) Dili na kinahanglan nga depensahan ni Moises ang iyang kaugalingon. Si Jehova nakadungog sa ilang mga reklamo, ug siya mismo ang milihok alang kang Moises.
Giisip ni Jehova nga ang maong pagreklamo maoy batok kaniya mismo. Kay sa pagkatinuod siya ang nagtudlo kang Moises nga mahimong lider sa nasod. Iyang gibadlong si Miriam ug Aaron ug gipahinumdoman sila nga siya may suod nga relasyon kang Moises: “Baba sa baba ako nakigsulti kaniya.” Dayon gipangutana sila ni Jehova: “Nan, nganong kamo wala mahadlok sa pagsulti batok . . . kang Moises?” (Bersikulo 8) Tungod sa ilang pagreklamo batok kang Moises, sila nakasala sa Diyos. Tungod sa grabeng kawalay-pagtahod, ilang naagoman ang kasuko sa Diyos.
Si Miriam, nga lagmit maoy nanguna sa pagreklamo, gihampak ug sanla. Dihadiha, si Aaron mihangyo kang Moises nga tabangan si Miriam. Hunahunaa ra—si Miriam nanginahanglan na karon sa tabang sa usa nga iyang gisigehag reklamo! Si Moises mapaubsanong mihimo sa gihangyo kaniya. Niining asoya, misulti si Moises sa unang higayon aron mangaliyupo kang Jehova alang sa iyang igsoon. Si Miriam naayo sa iyang sanla, apan kinahanglan niyang antoson ang kaulaw sa pito ka adlaw nga pagkuwarentinas kaniya.
Kini nga asoy nagtudlo kanato kon unsa nga mga hiyas ang gipabilhan ni Jehova ug kon unsa usab nga mga kinaiya ang iyang gidumtan. Kon gusto kitang masuod sa Diyos, kita kinahanglang maningkamot nga wad-on ang garbo, kasina, ug ambisyon nga lagmit anaa kanato. Si Jehova nahigugma sa mga maaghop. Siya nagsaad: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:11; Santiago 4:6.
[Footnote]
a Ang kaaghop maoy usa ka hiyas nga makatabang sa usa ka tawo nga lig-ong makaantos sa inhustisya nga walay tinguhang mobalos.