‘Ang Iyang Dili-Makita nga mga Hiyas Tin-awng Makita’

Motuo ka ba nga dunay Diyos? Kon mao, makahatag ka bag pamatuod sa iyang paglungtad? Ang tinuod, kita gilibotag ebidensiya nga dunay Maglalalang nga maalamon, gamhanan, ug mahigugmaon. Unsa kini nga ebidensiya, ug makapakombinsir ba gayod kini? Alang sa tubag, tagda ang giingon ni apostol Pablo sa iyang sulat sa mga Kristohanon sa Roma.

Si Pablo miingon: “Ang iyang [Diyos] dili-makita nga mga hiyas, nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, mao nga sila walay ikapangatarongan.” (Roma 1:20) Ingon sa gisulti ni Pablo, makita sa kalalangan ang mga hiyas sa Maglalalang. Busa, susihon nato ang gipamulong ni Pablo.

Ang mga hiyas sa Diyos makita “sukad sa paglalang sa kalibotan padayon,” matod ni Pablo. Niini nga konteksto, ang Gregong pulong nga gihubad ug “kalibotan” wala magtumong sa planetang Yuta. Hinunoa, nagtumong kini sa mga tawo.a Busa, ang gipasabot ni Pablo mao nga sukad sa paglalang sa tawo, makita na ang ebidensiya sa mga hiyas sa Maglalalang diha sa mga butang nga iyang gihimo.

Ang maong ebidensiya anaa sa atong palibot. Wala kini matago sa kinaiyahan apan kini “tin-awng makita.” Gikan sa kinadak-an ngadto sa kinagamyan, ang kalalangan tin-awng nagbutyag dili lang nga dunay Maglalalang kondili nga siya usab may maayong mga hiyas. Dili ba ang intelihenteng disenyo nga dayag kaayo diha sa kinaiyahan nagbutyag sa kaalam sa Diyos? Dili ba ang bituonong kalangitan ug ang dagkong balod sa kadagatan nagbutyag sa iyang gahom? Ug dili ba ang nagkadaiyang pagkaon nga makapatagbaw sa atong panglami ug ang maanindot nga pagsubang ug pagsalop sa adlaw nagbutyag sa iyang gugma sa katawhan?​—Salmo 104:24; Isaias 40:26.

Tin-aw ba ang ebidensiya? Tin-aw kaayo kini nga kadtong moingon nga wala makakita niana ug busa wala motuo nga dunay Diyos “walay ikapangatarongan.” Giilustrar kini sa usa ka eskolar niining paagiha: Handurawa ang usa ka drayber nga wala manumbaling sa karatulang “Detour​—Turn Left.” Gipara siya sa polis ug gitiketan. Ang drayber nangatarongan nga wala siya makakita sa karatula. Apan wala motuo ang polis kaniya kay klaro kaayo ang karatula, ug wala ra may diperensiya ang iyang mata. Gawas pa, ingong drayber, responsabilidad niya ang pagtan-aw ug pagsunod sa mga karatulang sama niana. Ingon usab niana ang ebidensiya diha sa kinaiyahan nga dunay Diyos. Ang maong “karatula” klaro kaayo. Ingong intelihenteng mga linalang, kita makakita gayod niana. Dili kita makapangatarongan nga wala nato kana makita.

Sa pagkatinuod, ang basahon sa kalalangan daghag gibutyag bahin sa atong Maglalalang. Apan aduna pay laing basahon nga nagbutyag ug mas daghan pa bahin kaniya​—ang Bibliya. Sa mga panid niini atong mahibaloan ang tubag sa hinungdanong pangutana: Unsay katuyoan sa Diyos alang sa yuta ug sa mga tawo nga nagpuyo niini? Ang pagkahibalo sa tubag sa maong pangutana makatabang kanimo nga mas masuod sa Diyos kansang ‘dili-makita nga mga hiyas tin-awng makita’ sa atong palibot.