Pagpugas sa Unang mga Binhi sa Gingharian—Sa Portugal

SAMTANG gihapakhapak sa mga balod sa Atlantic ang barko nga nagpadulong sa Europe, si George Young, nga usa sa mga pasahero, malipayong naghunahuna sa iyang nahimo sa Brazil alang sa Gingharian.a Pero samtang nagbiyahe, nabalhin ang iyang hunahuna sa iyang bag-ong asaynment​—ang wala pa kaayo masangyawi nga mga teritoryo sa Spain ug Portugal. Inig-abot niya didto, gusto niyang mag-organisar ug mga pakigpulong nga ihatag ni Brader J. F. Rutherford ug mag-apod-apod ug 300,000 ka tract!

Pag-abot ni Brader Young sa Lisbon sa tingpamulak niadtong 1925, gubot kaayo ang maong lugar. Ang republican nga rebolusyon niadtong 1910 nagtapos sa monarkiya ug ang Katolikong Simbahan halos wala nay gahom. Mas gawasnon na ang mga tawo, pero gubot gihapon ang nasod.

Samtang naghimog kahikayan si Brader Young para sa pakigpulong ni Brader Rutherford, ang gobyerno nagpatuman ug martial law kay may gustong magkudeta. Ang sekretaryo sa British and Foreign Bible Society nagpasidaan kang Brader Young nga seguradong daghan ang magsusupak didto. Bisan pa niana, nangayo si Brader Young ug permit nga gamiton ang gym sa Camões Secondary School, ug gihatagan siya!

Dayon, miabot ang Mayo 13​—ang adlaw sa pakigpulong ni Brader Rutherford. Eksayted kaayo ang tanan! Ang mga plakard diha sa mga bilding ug ang mga mantalaan nag-anunsiyo sa pakigpulong publiko nga “Kon Unsaon nga Mabuhi sa Yuta Hangtod sa Hangtod.” Ang relihiyosong mga magsusupak nag-imprenta dayon ug artikulo sa ilang mantalaan nga nagpasidaan sa ilang mga magbabasa batok niining bag-ong abot nga “mini nga mga manalagna.” Sa entrada sa gym, nanghatag sab silag linibong brosyur nga may mga impormasyon batok sa gipanudlo ni Brader Rutherford.

Bisan pa niana, mga 2,000 ang nakasulod sa gym, ug mga 2,000 pod ang wala makasulod kay puno na. Ang pipila nga nainteres mikapyot sa mga hagdang pisi sa gym; ang uban nagpatong sa mga gamit sa ehersisyo.

Pero may problema gihapon. Ang mga magsusupak naninggit ug gipangguba ang mga lingkoranan. Apan si Brader Rutherford kalmado gihapon ug mipatong sa lamesa aron madunggan siya. Human sa pakigpulong​—nga halos tungang gabii na—​kapig 1,200 ka interesado ang nagbilin sa ilang ngalan ug adres aron makadawat ug mga publikasyon. Pagkaugma, ang mantalaang O Século nag-imprentag artikulo bahin sa pakigpulong ni Brader Rutherford.

Pagka-Septiyembre 1925, gisugdag imprenta sa Portugal ang Portuguese nga The Watch Tower. (Una pa niana, giimprenta na sa Brazil ang maong magasin sa Portuguese.) Nianang mga panahona, ang Estudyante sa Bibliya sa Brazil nga si Virgílio Ferguson nagplanong mobalhin sa Portugal aron motabang sa buluhaton. Sayo pa niana, magkauban sila ni Brader Young sa gamayng sangang buhatan sa mga Estudyante sa Bibliya sa Brazil. Wala madugay, mibiyahe si Virgílio ug ang iyang asawang si Lizzie aron ubanan na pod si Brader Young. Sakto ra ang pag-abot ni Brader Ferguson kay wala madugay, mibalhin si Brader Young sa laing teritoryo, nga nag-apil sa Soviet Union.

Dihang nagkudeta ang militar ug gipailalom sa diktadorya ang Portugal, misamot ang pagsupak sa buluhaton. Pero si Brader Ferguson wala mobiya sa nasod. Padayon niyang giproteksiyonan ang gamayng grupo sa mga Estudyante sa Bibliya ug gipauswag ang ilang buluhaton. Mikuha siyag permit nga gamiton ang iyang balay aron regular nga magkatigom. Pagka-Oktubre 1927, gihatagan siya.

Sa unang tuig sa diktadorya, mga 450 ka tawo sa Portugal ang may subskripsiyon sa The Watch Tower. Dugang pa, pinaagi sa mga tract ug booklet, ang kamatuoran nakaabot sa lagyong lugar sa Imperyo sa Portugal​—Angola, Azores, Cape Verde, East Timor, Goa, Madeira, ug Mozambique.

Sa ulahing bahin sa katuigan sa 1920, ang usa ka ordinaryong hardinero nga Portuguese, si Manuel da Silva Jordão, miadto sa Lisbon. Samtang didto sa Brazil, nakadungog siyag diskurso ni Brader Young. Naila dayon niya ang kamatuoran ug gusto niyang motabang kang Brader Ferguson sa pagpauswag sa buluhatong pagsangyaw. Aron mahimo nâ, si Manuel nag-alagad ingong colporteur, nga maoy tawag sa una sa mga payunir. Kay organisado na kaayo nianang panahona ang pag-imprenta ug pagpanagtag ug mga publikasyon, ang bag-ong kongregasyon sa Lisbon miuswag!

Pagka-1934, si Brader ug Sister Ferguson kinahanglang mobalik sa Brazil. Pero, napugas na ang binhi sa kamatuoran. Bisan pa sa grabeng kagubot sa Europe panahon sa Spanish Civil War ug Gubat sa Kalibotan II, ang matinumanong grupo sa mga igsoon sa Portugal nagmaunongon gihapon kang Jehova. Nianang panahona, mora silag baga. Pero pagka-1947, samag midilaab sila dihang miabot ang unang misyonaryong nabansay sa Gilead, si John Cooke. Human niana, wala mapugngi ang pagdaghan sa mga magsasangyaw. Bisan dihang gidili sa gobyerno ang buluhaton sa mga Saksi ni Jehova niadtong 1962, padayon silang midaghan. Niadtong Disyembre 1974, legal nga giila ang mga Saksi ni Jehova ug dihay kapig 13,000 ka magmamantala sa nasod.

Karon, kapig 50,000 ka magmamantala ang nagsangyaw sa Portugal ug sa pipila ka isla nga Portuguese ang pinulongan, apil ang Azores ug Madeira. Apil niini nga mga magmamantala ang mga kaliwat niadtong pipila nga nakatambong sa makasaysayanhong pakigpulong ni Brader Rutherford niadtong 1925.

Mapasalamaton ta kang Jehova ug nianang matinumanong mga igsoon kinsa maisogong nanguna sa buluhaton ingong ‘publikong mga alagad ni Kristo Jesus ngadto sa kanasoran.’​—Roma 15:15, 16.​—Gikan sa among archives sa Portugal.