Ginatuman Mo ba ang mga Butang Imong Nakat-onan?
1 Usa ka kalipay gayod nga nakatambong sa “Balaang Hustisya” Distritong Kombensiyon! Sa matag adlaw ang programa nag-awas uban sa pagpalig-on ug mapuslanong mga sugyot kon sa unsang paagi atong ikapadayag ang hustisya ug pagkamatarong sa Diyos ngadto sa mas dako pang paagi. Karon nga ikaw nakauli na, imo bang ‘gipadapat ang mga butang nga imong nakat-onan, nadunggan, ug nakitang gipasundayag’? (Filip. 4:9) Makaayong sublion ang pipila sa dagkong puntos gikan sa programa sa kombensiyon.
2 Hinumdomi ang pakigpulong nga “Himoa ang Timbang, Yanong Kinabuhi” sa palis sa Huwebes. Kini gipasukad sa Mateo 6:19-33. Imo bang dulot nga gipalandong kon unsay imong mahimo sa di-pagpabug-at sa imong kaugalingon sa di-kinahanglanong mga butang, nga adunay dugang panahon sa pagtuon, sa pagpangandam sa miting, ug sa pagtabang sa uban? Unsang mga kausaban ang imong mahimo aron makahimog yanong kinabuhi uban sa pipila ka kabaldahan?
3 Ang panginahanglang makabenepisyo gikan sa pagbansay nga gitagana ni Jehova pinaagi sa iyang Pulong ug kapunongan gipasiugda sa bahin nga “Dawata ang Disiplina ug Mahimong Maalamon.” Ang uban tingali kinahanglang magtagad gayod aron pinohon ug pauswagon ang ilang ministeryo. Regular ta bang gigamit ang Ulohan nga Mahisgotan, nga nagapasalga sa tagbalay diha sa panaghisgot? O kita ba kontento na uban sa mga presentasyon sa magasin? Ato ba gipadapat ang tambag bahin sa paggamit sa basahong Nangatarongan, nga nagasundal sa interes, ug nagadumalag mga pagtuon sa Bibliya?—Prov. 8:33.
4 Ang programa sa Biyernes naglakip sa pahayag nga “Magmahinlo sa Hunahuna ug sa Lawas.” Ang balaang hustisya nagakinahanglan nga ang katawhan sa Diyos maoy mahinlo sa espirituwal, sa moral, sa hunahuna, ug sa pisikal. (2 Cor. 7:1) Ikaw ba ‘nagatuman kon unsa ang nakat-onan’ niining butanga? Sa unsang paagi? Atong pagahuptan ang espirituwal nga kahinlo pinaagig pagpalayo gikan sa mahugaw nga relihiyon ug gikan sa mga apostata. Kinahanglang disiplinahon ang atong kaugalingon aron makalikay sa di-mahinlong mga kagawian o nagatagad sa daotan seksuwal nga mga kailibgon, nga mohatod ngadto sa mental ug moral nga kahugawan. (Job 31:1, 9-11) Nagalikay ka ba sa mga sine, programa sa TV, o basahon nga adunay makadaot nga impluwensiya kanimo o sa imong banay? Gipunting man nga ang pipila nagpasagad sa personal nga kalinis ug kahinlo sa panimalay. Kon aduna bisan kinsa nga may kahuyangan niining bahina, dayag nga himoon ang mga kausaban. Kinahanglang mokooperar ang matag membro sa pamilya sa pagmentinar sa kahinlo ug kahapsay sa panimalay. Ilabinang sa panahong morepresentar kang Jehova diha sa ministeryo buot ta nga mahapsay ang pamostura ug magsuot ug malinis ug kasarangang senina. Sa ingon niana atong gipasidunggan ang atong balaang Diyos.—1 Ped. 1:14-16.
5 Ang umaabot nga mga gula sa Atong Ministeryo sa Gingharian magapahinumdom kanato sa ubang hinungdanong mga bahin sa balaang hustisya nga atong nakat-onan didto sa atong mga kombensiyon. Kini makatabang sa tanan sa pagpadapat niining mga prinsipyoha diha sa atong adlaw-adlaw nga mga kinabuhi, nga sa ingon mahimong “mga magtutuman sa pulong, ug dili mga mamiminaw ra.”—Sant. 1:22-25.