Makahuloganon nga mga Tigom sa Dayon na nga Pagsangyaw
1 Sa Lucas 10:1-11, may usa ka rekord sa usa ka tigom nga gihimo ni Jesus uban sa 70 ka tinun-an sa pag-andam kanila sa pagsangyaw. Siya nagtaganag instruksiyon sa pag-organisar kanila, pag-andam kon unsay ilang isulti, ug pagdumala sa malisod nga mga kahimtang. Kita makakat-on pinaagig pagsusi niining maong taho.
2 Dayag nga ang tanang 70 ka tinun-an presente alang sa maong tigom uban kang Jesus. Daghang panahon ang mausik sa mga tigom sa dayon na nga pagsangyaw kon ang pipila nagabatasan nga ulahing moabot. Ang ilang ulahing pag-abot sagad maghimo sa panginahanglang organisahon pag-usab ang mga grupo ug mga asaynment sa teritoryo. Kini magpalangan sa tibuok grupo.
3 Si Jesus naghatag sa grupo ug usa ka tinong ulohan nga magamit, nga mao, “ang gingharian sa Diyos.” (Luc. 10:9) Kita gitudlo nga magwali sa samang mensahe, ug sagad ginapabilhan nato ang mga sugyot kon unsay isulti. Ang tagdumala mahimong mogamit sa librong Nangatarongan, nga may kapin sa 40 ka pasiuna nga magamit. Ang pagrepaso sa usa o duha niini makatabang kanato sa pagsulti uban ang labawng pagsalig diha sa mga pultahan.
4 Dili lamang kay gisultihan ni Jesus ang iyang mga tinun-an kon unsa ang isulti apan sila gisultihan niya kon unsaon pagsulti kana. (Luc. 10:5, 6) Ang mga pasundayag gipakita diha sa Tigom sa Pag-alagad kada semana nga nagapakita kanato kon unsaon nato pagpahayag nga epektibo ang atong kaugalingon. Ang tagdumala hayan magsubli sa gipresentar sa miaging tigom. Ang usa ka mubong pasundayag sa usa ka yanong presentasyon makabulig kanato sa pag-usa sa atong mga hunahuna ug ipahayag kana sa mga pulong.
5 Si Jesus nagpahimangno usab sa iyang mga tinun-an maylabot sa ilang personal nga panggawi. (Luc. 10:7, 8) Ang tagdumala sa susama magahatag ug tin-awng pahimangno sa pagtabang kanato nga makalikay sa bisan unsang butang nga makabalda sa atong buluhaton. Siya mahimong magpahimatngon kanato bahin sa pagtapoktapok diha sa mga kanto sa dalan o sa pag-usik ug panahon sa pagpakiglantugi sa mga magsusupak. Siya makapahinumdom kanato sa panginahanglang maghupot ug tukmang talaan sa balaybalay. Ang mga ginikanan mahimong kinahanglang pahinumdoman bahin sa maampingong pag-atiman sa ilang kabataan.
6 Ang 70 ka tinun-an mituman sa mga instruksiyon ni Jesus ug human niana “namalik uban ang kangaya.” (Luc. 10:17) Kon kita mosanong sa pahimangno nga atong madawat sa mga tigom sa dayon na nga pagsangyaw, kita usab makadahom ug napauswag nga kangaya diha sa pagsangyaw sa mensahe sa Gingharian.—Buh. 13:48, 49, 52.