Ilang Masabot nga Kita Lahi
1 Sa miaging tuig, kapin sa 300,000 ka bag-ohan ang miduyog kanato pinaagi sa pagpabawtismo. Unsay nasabtan niining mga tawhana diha sa mga Saksi ni Jehova nga nagpahimo nila nga buot mahimong bahin sa organisasyon sa Diyos? Nganong kita milahi gikan sa tanang ubang relihiyon? Ania ang pipila ka dayag nga mga tubag:
—Kita mitapot sa Bibliya inay kay sa personal nga mga opinyon: Atong gisimba si Jehova nga Diyos “pinaagi sa espiritu ug kamatuoran,” sama sa giingon ni Jesu-Kristo nga buhaton. Nagkahulogan kini sa pagsalikway sa relihiyosong mga kabakakan ug sa pagsunod sa nasulat nga Pulong sa Diyos.—Juan 4:23, 24; 2 Tim. 3:15-17.
—Kita moadto sa mga tawo inay kay hulaton sila nga moduol kanato: Atong gidawat ang sugo ni Kristo sa pagsangyaw ug pagtudlo, ug atong gisundog ang iyang panig-ingnan sa pagpangita sa mga matinud-anog kasingkasing. Ato silang gipangita diha sa ilang mga pinuy-anan, diha sa dalan, o bisan diin nga sila hayan makaplagan.—Mat. 9:35; 10:11; 28:19, 20; Buh. 10:42.
—Kita nagataganag instruksiyon sa Bibliya alang sa matag usa nga walay bayad: Kita libreng naggasto sa atong mga kahinguhaan ug kusog, nga nagagugol ug kapin sa usa ka bilyong oras matag tuig sa pag-alagad sa Diyos. Sa walay pagpihig, atong gitun-an sa Bibliya ang tanang matang sa mga tawo.—Mat. 10:8; Buh. 10:34, 35; Pin. 22:17.
—Kita nabansay pag-ayo sa pagtabang sa mga tawo sa espirituwal nga paagi: Pinaagi sa atong personal nga pagtuon sa Bibliya ug sa instruksiyon nga gitagana sa mga tigom sa kongregasyon, mga asembliya, ug mga kombensiyon, atong madawat ang bililhon-kaayo, padayon nga teokratikanhong edukasyon, nga magpaarang kanato nga malamdagan ang uban sa espirituwal nga paagi.—Isa. 54:13; 2 Tim. 2:15; 1 Ped. 3:15.
—Seryoso natong gidawat ang kamatuoran, nga nagpadapat niana sa atong matag adlawng mga kinabuhi: Tungod sa atong gugma sa Diyos, kita nagabag-o, nga nagapahiuyon sa atong mga kinabuhi sa iyang kabubut-on. Ang atong samag-Kristong bag-ong personalidad nagadani sa uban ngadto sa kamatuoran.—Col. 3:9, 10; Sant. 1:22, 25; 1 Juan 5:3.
—Kita naningkamot sa pagkinabuhi ug sa pagbuhat duyog sa uban diha sa pakigdait: Ang pag-ugmad sa diyosnong mga hiyas nagatabang kanato sa pagbantay sa atong mga aksiyon ug sinultihan. Kita ‘mangita sa pakigdait ug pangagpason kini’ duyog sa tanang tawo.—1 Ped. 3:10, 11; Efe. 4:1-3.
2 Ang mga panig-ingnan sa Kristohanong pagkinabuhi nga makita sa mga tawo diha sa organisasyon ni Jehova magpalihok sa daghan sa pagdawat sa kamatuoran. Hinaot ang atong personal nga panig-ingnan adunay samang epekto diha kanilang makahibalo ug makapaniid kanato.