Tibuok-Kalibotang Pagsaulog sa Kamatayon ni Kristo
1 Si Jehova nagbisibis kanato sa daghang gasa. Ang katibuk-an sa iyang pagkamaayo ug mahigugmaong-kalulot tin-awng gihubit ingong “iyang dili-mahubit nga libreng gasa.” Oo, ang “dili-takos nga kalulot sa Diyos” maoy kahibulongan kaayo nga ang paghubit niini naghingapin sa atong katakos.—2 Cor. 9:14, 15.
2 Ang Iyang Kinadak-ang Gasa: Si Jesu-Kristo, ingong Manunubos sa katawhan, mao ang kinadak-ang gasa sa tanan. Sa pagpahayag sa iyang dakong gugma alang sa kalibotan sa katawhan, gihatag ni Jehova ang iyang hinigugma ug bugtong nga Anak. (Juan 3:16) Ang maong dili-takos nga panalangin gikan sa Diyos angay sa tibuok-kalibotang pagsaulog. Kanus-a ug sa unsang paagi? Sa gabii sa Huwebes, Abril 1, 1999, ang mga Kristohanon sa tibuok kalibotan magsaulog sa Panihapon sa Ginoo, nga maghandom sa Memoryal sa kinadak-an sa tanang paghalad.—1 Cor. 11:20, 23-26.
3 Si Kristo namatay alang kanato bisag “samtang kita mga makasasala pa,” ug mahimo natong ipakita ang atong personal nga pagpasalamat pinaagi sa pagsaulog sa Memoryal sa iyang kamatayon ug pinaagi sa pagdapit sa uban nga moduyog kanato nianang hinungdanon-kaayong okasyon.—Roma 5:8.
4 Ang Labing Hinungdanong Hitabo: Ang pagsaulog sa kamatayon ni Kristo nagapasiugda gayod nga lunsay niyang gituboy ang soberanya sa Diyos. Nagapahinumdom usab kini kanato nga kita makapahimulos sa usa ka hinlong pagbarog atubangan ni Jehova pinaagi sa paghupot ug pagtuo sa halad ni Jesus, nga niana ang kaluwasan mapaneguro. (Buh. 4:12) Sa pagkamatuod, kini mao ang labing hinungdanong hitabo sa tuig!
5 Ang gugma sa atong mga silingan madayag diha sa atong pagdapit kanila sa pagsaulog sa Panihapon sa Ginoo uban kanato. Ang mga kaayohan sa lukat padayong mabatonan sa minilyon nga mokat-on sa nagalabaw nga bili niini. (Filip. 3:8) Kadtong naghupot ug pagtuo sa halad ni Kristo makabaton sa lig-ong paglaom sa kinabuhing walay kataposan.—Juan 17:3.
6 Ang panahon sa Memoryal nagataganag linaing mga kahigayonan alang kanato nga ipakita ang pagpabili sa nagalabaw nga dili-takos nga kalulot sa Diyos. Mao kini ang hamiling panahon sa pagpakig-ambit nga masiboton sa pagwali sa maayong balita sa Gingharian sa Diyos. Dagkong mga kaayohan ang nagahulat sa tanan nga mainampoong mamalandong bahin sa di-mahubit nga libreng gasa ni Jehova ug maghikay nga makatambong niining tuiga nga pagsaulog sa Panihapon sa Ginoo!