Pag-ampo sa Tabang ni Jehova

¹ Gisilsil ni Jesus sa iyang mga tinun-an ang panginahanglan sa panalangin ni Jehova sa ilang ministeryo. (Mat. 9:​37, 38) Ang atong kinasingkasing nga mga pag-ampo sa pagdayeg ug pagpasalamat uban ang tim-os nga mga pangaliya ug mga pangamuyo nagapasundayag sa atong bug-os nga pagsalig kang Jehova alang sa iyang tabang. (Filip. 4:​6, 7) Ang Kasulatan nag-agda kanato nga magpadayon sa pag-ampo uban ang “tanang matang sa pag-ampo ug pangamuyo,” ug kini mapadapat sa atong mga pag-ampo mahitungod sa ministeryo.​—Efe. 6:​18.

² Atong ginadayeg si Jehova diha sa pag-ampo tungod sa iyang di-hitupngang mga hiyas ug mga kalamposan. Atong ginadayeg usab siya ingong Maghahatag sa maayong balita nga atong ginawali. Siya takos sa atong pagdayeg tungod kay siya lamang ang makapalampos sa atong ministeryo.​—Sal. 127:1.

³ Ang atong mga pag-ampo sa pagpasalamat magpahayag ug apresasyon tungod sa pagsabot nga gihatag ni Jehova kanato maylabot sa iyang kabubut-on ug katuyoan. Dili ba usa ka pribilehiyo nga ipaambit ang mga kamatuoran sa Gingharian sa uban? Kita magpasalamat kang Jehova sa tanang atong mahimo diha sa ministeryo.​—Sal. 107:8; Efe. 5:​20.

⁴ Nga haom kaayo, kita mangayog tabang kang Jehova sa pagkaplag ug mga tawo nga modawat sa atong tanyag sa usa ka pagtuon sa Bibliya, ug kita mangayog tabang sa pag-abot sa ilang mga kasingkasing pinaagig kamatuoran. Pinaagi sa paghimo sa maong mga pangaliya, atong giila nga ang Diyos lamang ang makahimo sa atong buluhaton sa ministeryo nga mabungahon.​—1 Cor. 3:​5-7.

⁵ Usa ka sister nakamatikod nga ang usa ka babaye diha sa iyang ruta sa magasin wala basaha Ang Bantayanang Torre ug Pagmata! Kay dili buot nga kining bililhong mga magasin mausik, siya nangamuyo kang Jehova nga kon ang babaye wala magbasa niana, siya dili na modawat niini. Sa dihang ang sister miduaw sa sunod panahon, ang bana sa babaye miingon: “Salamat sa paghatod niining mga magasina nga makanunayon. Ako nagabasa niini ug nagustohan ko gayod kini.”

⁶ Uban sa pagkamapainubsanon ug mainitong pangaliyupo, kita makapangamuyo kang Jehova nga tabangan kita sa pakiglabot sa di-pagpanumbaling ug pagbiaybiay sa katilingban ug sa pagbuntog sa bisan unsang kahadlok sa tawo aron nga padayong maisogon sa pagsangyaw ngadto sa uban. (Buh. 4:​31) Kon kita mopadayon sa pag-ampo uban ang “tanang matang sa pag-ampo ug pangamuyo” samtang matinumanon natong gipangagpas ang atong sagradong pag-alagad, kita makasalig sa tabang ni Jehova.​—1 Juan 3:​22.