Mahala Pag-ayo ang Matahom nga Ngalan ni Jehova

¹ Gipakaulawan ni Satanas ang ngalan sa Diyos sa dihang iyang gihaylo ang atong unang mga ginikanan sa pagpakasala. Ang Yawa nagpasumbingay nga si Jehova namakak kang Adan. (Gen. 3:​1-5) Sanglit ang balaang ngalan nalangkit sa katakos sa Diyos sa pagtuman sa iyang pulong, ang tumotumo ni Satanas mao ang labing grabeng pagpakaulaw. Pinaagi sa padayong pagtuman sa iyang balaang katuyoan, nahinloan ni Jehova ang iyang ngalan sa kaulawan ug naghimo nianang matahom.​—Isa. 63:​12-​14.

² Kita ang katawhan nga si Jehova ‘mitawag sa iyang ngalan.’ (Buh. 15:​14, 17) Nagahatag kini kanatog kahigayonan sa pagpakita kon unsay atong gibati sa pagbalaan niana. Atong nakaplagan ang ngalan ni Jehova nga matahom gayod, sanglit naghawas kini sa tanang butang nga maayo, mabination, mahigugmaon, maluluy-on, ug matarong. Kita napuno sa kataha sa pagkadako sa mahimayaong ngalan sa Diyos. (Sal. 8:​1; 99:​3; 148:13) Kita angayng matukmod sa pagbuhat ug unsa?

³ Balaana ang Ngalan sa Diyos: Ang ngalan sa Diyos dili mas mapabalaan tungod kay kini labing balaan na. Apan pinaagi sa atong hinlong panggawi ug pagsangyaw sa Gingharian, atong ikapasundayag nga atong gimahal gayod pag-ayo ang ngalan sa Diyos. Kita mopatugbaw: “Pasalamati ninyo si Jehova! Sangpita ang iyang ngalan. Ipahayag taliwala sa mga katawhan ang iyang mga pakiglabot. Ipahibalo nga ang iyang ngalan ginabayaw.” (Isa. 12:4) Sa unsang paagi mahimo nato kini?

⁴ Kita makapahimulos sa matag kahigayonan sa pagmantala sa ngalan ni Jehova ug sa tanang gihawasan niana. Sa pormal man o sa impormal nga paagi, sa pamalaybalay o sa katindahanan, diha sa dalan o sa telepono, ang atong pagsangyaw nga kalihokan nagpasidungog kang Jehova. Sa dihang makakaplag kitag mga interesado nga maminaw, kita angayng mohimog tinong mga kasabotan sa pagbalikduaw ug sa pagtudlo pa kanilag dugang bahin kang Jehova. Kana nagpasabot nga dili gayod nato pakyason ang pagtuman sa maong mga kasabotan ug magmalahutayon sa atong mga paningkamot sa pagsugod ug mga pagtuon sa Bibliya sa balay. Nga ikalipay, matag tuig gatosan ka libo ang nakadangat sa pagkaila, pagtahod, ug pagbalaan sa matahom nga ngalan ni Jehova.

⁵ Ang atong tibuok-kasingkasing nga pakig-ambit sa buluhatong pagbalaan sa ngalan sa Diyos tin-awng nagpakita kon asa kita nagbarog sa isyu nga gipatungha ni Satanas sa Eden. Kini ang labing halangdon, dungganong buluhaton nga atong mabuhat. Atong mahalon pag-ayo ug masibotong dayegon ang matahom nga ngalan ni Jehova!​—1 Cron. 29:13.