Gipabilhan Mo ba ang Pailob ni Jehova?
1 Kon si Jehova wala pa magpailob sa miaging 10, 20, ug kapin pang katuigan, nga nagtugot nga ihatag ang gilugwayang pagpamatuod, nakat-onan kaha nimo ang kamatuoran? Pagkamapasalamaton nato nga siya nagtugot sa daghan pang tawo nga ‘makakab-ot sa paghinulsol.’ Bisan pa niana, ang dakong adlaw ni Jehova sa paghukom “moabot ingon sa usa ka kawatan.” (2 Ped. 3:9, 10) Busa, ang pailob sa Diyos dili angayng saypon sa pagsabot ingong usa ka pagkalangan sa pagtapos niining sistema sa mga butang.—Hab. 2:3.
2 Kaluy-i ang mga Tawo: Ang hataas-nga-pailob ni Jehova labaw kaayo sa atong panabot. Kinahanglang dili kita mawad-an sa pagsabot sa katuyoan niini. (Jon. 4:1-4, 11) Nakita ni Jehova ang makaluluoy nga kahimtang sa katawhan ug mabination kanila. Si Jesus mibati sa samang paagi. Kay naluoy sa mga panon sa katawhan nga iyang gisangyawan, buot niyang pasangkaron ang buluhatong pag-ebanghelyo aron daghan pa ang makabaton ug kahigayonan sa pag-angkon ug kinabuhing walay kataposan.—Mat. 9:35-38.
3 Sa dihang ang mga trahedya ug mga katalagman mohapak, dili ba kita mobatig empatiya alang sa mga tawo nga wala mahibalo sa kamatuoran? Ang mga tawo karon maoy sama sa ‘mga karnero nga walay magbalantay’ samtang sila naningkamot sa pagsagubang ug pagsabot sa kagubot sa kalibotan. (Mar. 6:34) Pinaagi sa masibotong pagsangyaw sa maayong balita, atong mahupay kadtong sa husto napahimutang nga kasingkasing ug ipasundayag ang atong pagpabili sa pailob ni Jehova.—Buh. 13:48.
4 Dinalian ang Atong Buluhaton: Sa miaging tuig dihay 323,439 ang nabawtismohan ug kapin sa 14,000,000 ang mitambong sa Memoryal. Pagkadakong purohan alang sa daghan pa nga makaikyas sa kalaglagan niining daotan nga sistema! Kon unsa ka daghan ang “dakong panon” unya, wala kita mahibalo. (Pin. 7:9) Kon unsa pa kadugay ang atong buluhatong pagsangyaw, wala kita mahibalo. Apan si Jehova nahibalo. Ang maayong balita isangyaw alang sa iyang katagbawan, “ug unya moabot ang kataposan.”—Mat. 24:14.
5 Ang panahong nahibilin mubo na, ug ang adlaw sa Diyos haduol na. (1 Cor. 7:29a; Heb. 10:37) Nga walay pagduhaduha, “ang atong kaluwasan mas duol kay sa dihang kita nahimong mga magtutuo.” (Roma 13:11) Dili nato pakyason ang pagsabot sa katuyoan sa pailob sa Diyos. Hinunoa, sa pagkadinalian mosangyaw kita aron ang dugang pang nangandoy sa pagkamatarong mahimong makapahimulos sa dakong kaluoy ni Jehova.