“Usa ka Pulong nga Gisulti sa Hustong Panahon”
1 Ang pagpaambit ba sa mensahe sa kinabuhi ngadto sa uban usa ka hagit alang kanimo? Gibati ba nimo nga kinahanglan kang mosulti ug lalom nga butang aron makadayeg ang imong mga mamiminaw? Sa dihang gipadala ni Jesus ang iyang mga tinun-an, gisultihan niya sila: “Sa inyong pagpanglakaw, pagwali, nga magaingon, ‘Ang gingharian sa mga langit haduol na.’” (Mat. 10:7) Ang mensahe dili komplikado ug sayon nga ipaambit. Walay kalainan karong adlawa.
2 Sagad pipila lamang ka pulong ang gikinahanglan sa pagsugod ug panaghisgot. Sa dihang nahibalag ni Felipe ang Etiopianhong eunuko, siya nangutana kaniya: “Nakasabot ka ba gayod sa imong ginabasa?” (Buh. 8:30) Pagkamagantihon gayod nga panaghisgot ang miresulta tungod sa “usa ka pulong nga gisulti sa hustong panahon”!—Prov. 25:11.
3 Mahimo nimong gamiton ang susamang paagi diha sa imong ministeryo. Sa unsang paagi? Pinaagi sa pagkamapaniiron ug sa pagpilig mga pulong nga haom sa mga kahimtang. Pagsuknag usa ka pangutana, ug paminaw sa tubag.
4 Pipila ka Paninugdang mga Pangutana: Aron masugdan ang panaghisgot, mahimo nimong sulayan ang bisan hain niini nga mga pangutana:
◼ “Gigamit ba nimo ang Pag-ampo sa Ginoo (o, Amahan Namo) diha sa imong pagsimba?” (Mat. 6:9, 10) Litoka ang usa ka bahin, ug dayon moingon: “Ang pipila ka tawo mosukna, ‘Unsa ang ngalan sa Diyos nga giingon ni Jesus nga pagabalaanon (o, dayegon)?’ Ang uban mangutana, ‘Unsa ang Gingharian nga giingon ni Jesus nga angay natong iampo?’ Nakaplagan ba nimo ang makapatagbaw nga mga tubag niini nga mga pangutanaha?”
◼ “Nahibulong ka ba sukad: ‘Unsa ang kahulogan sa kinabuhi?’” Ipakita nga kini nalangkit sa kahibalo sa Diyos.—Eccl. 12:13; Juan 17:3.
◼ “Sa imong hunahuna mawagtang ba gayod ang kamatayon?” Gamita ang Isaias 25:8 ug Pinadayag 21:4 sa paghatag ug kasaligang tubag.
◼ “Aduna bay yanong solusyon sa kagubot sa kalibotan?” Ipakita nga ang Diyos nagtudlo nga “higugmaon mo ang imong silingan.”—Mat. 22:39.
◼ “Ang kosmikong katalagman ba maglaglag sa atong yuta sa umaabot?” Ipaambit ang saad sa Bibliya nga ang yuta magpabilin sa walay kataposan.—Sal. 104:5.
5 Ipresentar ang maayong balita diha sa yano, deretso ug malulotong paagi. Si Jehova magpanalangin sa imong mga panlimbasog nga ipaambit bisan ang “usa ka pulong” sa kamatuoran ngadto sa uban.