Balita Gikan sa Konstruksiyon sa Bethel
1 Nahibalo kami nga kamong tanan interesado nga masayod sa pag-uswag sa nagpadayong buluhaton sa konstruksiyon sa Bethel ug busa malipay kami sa paghatag kaninyo sa kinaulahiang mga balita. Sa ubos mao ang hulad sa mga tinukod sa Bethel nga nagpakita sa mahimong hitsura sa dihang ang tanang konstruksiyon matapos na.
2 Ang trabaho gisugdan sa Marso 1999 ug hangtod karon ang mosunod nga mga proyekto nakompleto na: Usa ka bag-ong planta sa waste water treatment natukod na; usa ka bag-ong deep well nakalot na; usa ka bag-ong 240,000-ka-litrong tangke nga pondohanag tubig natukod na; usa ka bag-ong Literature Reception natukod na; bag-ong mga parkinganan ug inaptan nga mga agianan nahimo na. Kadaghanan niining mga proyektoha nakompleto na antes ang bag-ong napulo-ka-andanang tinukod nga puy-anan gitukod.
3 Ang estruktura sa napulo-ka-andanang tinukod nga puy-anan gitukod sa tagagawas nga kontratista. Gisugdan kini sa Nobyembre, 1999 ug natapos sa Oktubre, 2000. Busa ang kontrata natapos nga wala pay usa ka tuig. Ang panapos nga trabaho sa sulod sa tinukod, lakip ang tanang pagpanaod ug tubo, elektrikal, ug air-conditioning, gipaigo sa ato mismong mga igsoon. Sa pagkakaron adunay 18 ka Internasyonal nga mga Alagad gikan sa 10 ka lainlaing mga nasod nga nagtrabaho sa atong proyekto. Kauban nila mao ang 40 ka bug-os-panahong lokal nga mga boluntaryo ug 9 ka trabahante sa Bethel.
4 Sa pagtukod niining napulo-ka-andanang tinukod, 4,254 metro kubikong konkreto ang nagamit. Kon kining gidaghanona sa konkreto gihimo pang karsada nga 3 metros ang gilapdon ug 150 milimetros ang gibag-on, kini moabot sa halos napulo ka kilometro! Dugang pa, ang total nga 775 ka tonilada sa kabilya ug 42 ka tonilada sa puthaw sa estruktura ang nagamit sa tinukod. Ang tanang muwebles sa 130 ka lawak gigama diha sa atong kaugalingong carpentry shop pinaagi sa ato mismong mga igsoon.
5 Alang sa unsa man pagagamiton ang bag-ong tinukod nga puy-anan? Kini adunay 130 ka lawak sa Bethel, busa kini makapapuyo ug 260 ka trabahante sa Bethel. Dugang pa, ang infirmary sa Bethel, laundry, klasehanan sa Ministerial Training School, librarya, ug pipila ka ubang mga opisina ibalhin ngadto sa bag-ong tinukod. Human niini, ang kosina ug lawak-kan-anan sa daandaang tinukod nga puy-anan padak-an aron kini makapalingkod hangtod sa 600 ka tawo. Busa, bisan kon ang bag-ong tinukod nga puy-anan gidahom nga makompleto sa Oktubre, 2001, hayan dangtan pag laing usa ka tuig ang pagtrabaho sa dakong pagpabag-o sa unang tinukod nga puy-anan.
6 Buot namong pasalamatan kamong tanan sa inyong padayong gihimong pinansiyal nga mga amot alang niini nga proyekto. Sanglit kini lagmit magpadayon hangtod sa tuig 2002, kami nag-awhag kaninyo sa pagpadayon sa pagpadala sa inyong boluntaryong suportar hangtod nga mahuman ang proyekto. Palihog padayon usab sa pag-ampo alang sa panalangin ni Jehova bahin sa proyekto, kay kon wala kini kana dili molampos.—Sal. 127:1.