Dasiga ang mga Payunir
1 Kitang tanan nagkinahanglag pagdasig, ug ang mga payunir ilabinang magpabili niana sa dihang ang mga ansiyano magpakitag interes kanila. Usa ka payunir nga sister misulat: “Buot kong pahibaloon kamo kon unsa ka dako ang akong apresasyon sa ‘mga ansiyano’ sa akong kongregasyon. . . . Mopatim-aw nga sa panahon nga ilabinang gikinahanglan ko ang ilang pagpaluyo ug pagdasig, si Jehova naghatag kanila sa mga pulong sa kaalam nga gikinahanglan kong madunggan.”
2 Sulod sa Enero, duha ka membro sa Komite sa Pag-alagad ang makigtigom sa tanang payunir, ug usa ka laraw ang gitagana na alang niining tigoma. Makaayong susihon sulod niining tigoma kon unsay mahimo sa pagpauswag sa mga oras sa mga payunir, sanglit ang aberids sa nasod maoy 54.1 lamang sa miaging tuig sa pag-alagad. Sa pagka-Disyembre 31, ang mga regular payunir kinahanglang nakataho na ug labing menos 280 ka oras. Kadtong wala pa makakab-ot niini angayng dasigon sa pagpasibo pag-usab sa ilang mga eskedyul sulod sa mosunod nga walo ka bulan aron makab-ot ang ilang tinuig nga tumong nga 840 ka oras. Kadtong maayo ang nahimo sa pagkab-ot sa mga kinahanglanong oras angayng hatagag komendasyon.
3 Sa dihang mubo ang ilang mga oras, mahimong daling maluya ang mga payunir. Kana ang hinungdan kon nganong gisugyot sa Atong Ministeryo sa Gingharian sa Oktubre, 1998, panid 7, nga regular nga sublion sa Sekretaryo ang kalihokan sa mga payunir ug pahibaloon ang mga ansiyano, ilabina ang Magtatan-aw sa Pag-alagad, aron nga ang mga payunir matabangan sa bisan unsang mga suliran sa dili pa kini mahimong grabe kaayo nga tingali magpahunong kanila sa buluhatong pagpayunir.
4 Sa walay duhaduha kining tinuig nga tigom uban sa mga payunir magpadasig ug magpalihok kanila, nga ‘maghatag ug espirituwal nga gasa’ ngadto kanila aron sila “mahimong lig-on” sa ilang payunir nga pag-alagad.—Roma 1:11.